بی ایم سی انتخابات: رجحانات میں مہایوتی اتحاد کی اکثریت، 227 نشستوں میں 131 پر برتری

ممبئی: برہن ممبئی میونسپل کارپوریشن کے انتخابات میں ووٹوں کی گنتی کے دوران سامنے آنے والے تازہ رجحانات کے مطابق بی جے پی کی قیادت والا مہایوتی اتحاد واضح اکثریت کی جانب بڑھتا دکھائی دے رہا ہے۔ جیسے جیسے گنتی آگے بڑھی، اتحاد نے اکثریتی ہندسے کو عبور کر لیا، جس سے شہر کی بلدیاتی سیاست میں طاقت کے توازن میں نمایاں تبدیلی کے آثار نظر آنے لگے ہیں۔

مہاراشٹر اسٹیٹ الیکشن کمیشن کی جانب سے جاری کردہ اعداد و شمار کے مطابق بی جے پی-۔مہایوتی اتحاد مجموعی طور پر بی ایم سی کی 227 نشستوں میں سے 131 پر سبقت حاصل کیے ہوئے ہے۔ ان میں 102 نشستوں پر بی جے پی کے امیدوار آگے بتائے جا رہے ہیں، جبکہ اس کے اتحادی شیو سینا (شندے دھڑا) کے امیدوار 29 نشستوں پر برتری برقرار رکھے ہوئے ہیں۔ اکثریتی ہندسے 114 کو عبور کرنے کے بعد اتحاد کی پوزیشن مستحکم ہوتی دکھائی دے رہی ہے، تاہم حتمی نتائج کا اعلان ہونا ابھی باقی ہے۔

اپوزیشن جماعتوں کی صورت حال پر نظر ڈالیں تو شیو سینا (ادھو بالا صاحب ٹھاکرے دھڑا) کے امیدوار 65 نشستوں پر آگے ہیں۔ مہاراشٹر نونرمان سینا 9 نشستوں پر سبقت رکھتی ہے، جبکہ کانگریس 15 نشستوں پر برتری حاصل کیے ہوئے ہے۔ اس کے علاوہ 7 نشستوں پر آزاد امیدوار آگے بتائے جا رہے ہیں۔ رجحانات کے مطابق مقابلہ کئی وارڈز میں سخت رہا ہے، جہاں ووٹوں کا فرق کم ہونے کے باعث نتائج میں تبدیلی کے امکانات سے بھی انکار نہیں کیا جا سکتا۔

انتخابی حکام کے مطابق ممبئی میں ووٹوں کی گنتی صبح سے پُرامن ماحول میں جاری ہے۔ تمام گنتی مراکز پر سیکورٹی کے خصوصی انتظامات کیے گئے ہیں اور نظم و نسق کی صورت حال پر قریبی نظر رکھی جا رہی ہے تاکہ گنتی کا عمل کسی رکاوٹ کے بغیر مکمل ہو سکے۔ حکام کا کہنا ہے کہ تمام کارروائی انتخابی ضابطوں اور ہدایات کے مطابق انجام دی جا رہی ہے۔

قابلِ ذکر ہے کہ مہاراشٹر کی تمام 29 میونسپل کارپوریشنوں کے انتخابات کے لیے ووٹنگ جمعرات کو منعقد ہوئی تھی، جبکہ جمعہ کی صبح سے ووٹوں کی گنتی کا عمل شروع ہوا۔ ریاست کے دیگر حصوں سے موصول ہونے والے ابتدائی رجحانات میں بھی بی جے پی کی قیادت والا اتحاد ناگپور، پونے، ناسک اور تھانے جیسے اہم شہری اداروں میں سبقت حاصل کرتا دکھائی دے رہا ہے۔ ووٹوں کی گنتی کا عمل جاری ہے اور حتمی نتائج کے اعلان کا انتظار کیا جا رہا ہے۔