بی جے پی تعلیم، اساتذہ اور طلبہ کی مخالف، اسکول بند کرکے بچوں کا مستقبل تاریک کر رہی ہے: اکھلیش یادو

لکھنؤ: سماج وادی پارٹی (ایس پی) کے سربراہ اور اتر پردیش کے سابق وزیر اعلیٰ اکھلیش یادو نے بھارتیہ جنتا پارٹی (بی جے پی) پر تعلیم، اساتذہ اور طلبہ مخالف ہونے کا الزام لگاتے ہوئے کہا ہے کہ اسکول بند کرنے کی پالیسی سے بچوں کے مستقبل کو نقصان پہنچ رہا ہے۔ انہوں نے کہا کہ اگر بی جے پی حکومت کے دور میں ایک بھی بچہ تعلیم سے محروم رہ جاتا ہے تو معیشت کا حجم ایک ہزار ارب ڈالر ہو یا پانچ ہزار ارب ڈالر، ایسی ترقی کی کامیابی صفر ہی سمجھی جائے گی۔

اکھلیش یادو نے پیر کو سوشل میڈیا پلیٹ فارم ’ایکس‘ پر ایک پوسٹ میں کہا کہ دیہی علاقوں میں پبلک ٹرانسپورٹ کی سہولت نہ ہونے اور تحفظ کے مسائل کے باعث اسکولوں کے انضمام (مرج) کے بعد والدین اپنی بچیوں کو دور دراز کے اسکولوں میں بھیجنے سے گریز کریں گے۔ اس سے لڑکیوں کی تعلیم متاثر ہونے کا خدشہ ہے۔ انہوں نے دعویٰ کیا کہ لوگ اپنے بچوں کو اسکولوں سے نکال رہے ہیں، لیکن ان مسائل کو صرف متاثرہ خاندان ہی بہتر طور پر سمجھ سکتے ہیں۔

ایس پی سربراہ نے بی جے پی کو قدامت پسند قرار دیتے ہوئے کہا کہ حکمراں جماعت جانتی ہے کہ تعلیم یافتہ افراد سوال کرتے ہیں اور تقسیم کی سیاست کی مخالفت کرتے ہیں۔ اسی لیے ان کے مطابق جتنے کم اسکول ہوں گے، بی جے پی کی مخالفت بھی اتنی ہی کم ہوگی۔ انہوں نے کہا کہ تعلیم حاصل کرنے والا شخص روزگار کا مطالبہ کرے گا، لیکن بی جے پی کے ایجنڈے میں ملازمتیں ہی شامل نہیں ہیں۔

اکھلیش یادو نے الزام لگایا کہ سرکاری ملازمتیں فراہم کرنے کی صورت میں ریزرویشن بھی دینا پڑے گا، اسی لیے بی جے پی ریزرویشن مخالف ہونے کے باعث روزگار کے مواقع پیدا کرنے میں دلچسپی نہیں رکھتی۔ انہوں نے کہا کہ بچوں کے والدین اور اساتذہ جتنی جلدی یہ سمجھ لیں گے کہ بی جے پی حکومت تعلیم، طلبہ اور اساتذہ کے خلاف ہے، اتنی ہی جلدی تبدیلی کی راہ ہموار ہوگی۔

انہوں نے بی جے پی کو متنبہ کیا کہ وہ طلبہ اور اساتذہ کو ایسی تحریک شروع کرنے پر مجبور نہ کرے جس کے نتیجے میں ہر شعبے میں تعطل پیدا ہو جائے۔ ان کا کہنا تھا کہ بی جے پی حکومت ہمیشہ اساتذہ اور طلبہ کے مسائل کے تئیں بے رخی کا مظاہرہ کرتی رہی ہے اور یہ ایک بے حس حکومت ہے۔

سابق وزیر اعلیٰ نے اساتذہ کی آن لائن حاضری کے خلاف چلائی گئی تحریک کا حوالہ دیتے ہوئے کہا کہ اس وقت بھی انہوں نے واضح کیا تھا کہ اساتذہ کا احترام اور ان پر اعتماد ہی ایک اچھی نسل کی تشکیل کی بنیاد ہے۔ ان کے مطابق گروؤں کے ساتھ بدزبانی اور ان کی توہین کرنے والے لوگ بھی ناخواندہ افراد جیسے ہیں۔ انہوں نے کہا کہ تکبر انسان کو ایسا بنا دیتا ہے کہ وہ نہ دوسروں کی تکلیف کو سمجھتا ہے اور نہ ہی ان کی بات سنتا ہے۔

اکھلیش یادو نے کہا کہ اساتذہ پر عدم اعتماد اور ان کی توہین کرکے بی جے پی حکومت نے ثابت کردیا ہے کہ وہ نہ تعلیم کا احترام کرتی ہے، نہ اساتذہ کا اور نہ ہی طلبہ کا۔ انہوں نے اپنی پوسٹ کے آخر میں دعویٰ کیا کہ اب تعلیم مخالف بی جے پی اقتدار سے باہر ہوگی اور دوبارہ کبھی واپس نہیں آئے گی۔ اکھلیش یادو نے اپنی پوسٹ کے ساتھ ایک غیر ملکی نیوز چینل کی ویڈیو کلپ بھی شیئر کی ہے۔