بی جے پی نعرہ بہت اچھا دیتی ہے، خواب بھی اچھے دکھاتی ہے، لیکن کام کے وقت نظر نہیں آتی: کانگریس

مغربی بنگال میں اسمبلی انتخاب کی سرگرمیاں عروج پر پہنچ چکی ہیں۔ ترنمول کانگریس اور بی جے پی کے ساتھ ساتھ کانگریس نے بھی حریف پارٹیوں کے خلاف اپنے حملے تیز کر دیے ہیں اور ریاست کی خستہ حالت کے لیے وزیر اعلیٰ ممتا بنرجی کے ساتھ ساتھ وزیر اعظم نریندر مودی کو بھی ذمہ دار ٹھہرا رہی ہے۔ آج کانگریس نے مرکزی حکومت کو ہدف تنقید بناتے ہوئے کہا کہ ’’بی جے پی نعرے بہت اچھے دیتی ہے، خواب بھی اچھے دکھاتی ہے، لیکن جب کام کرنے کی بات ہوتی ہے تو وہ نظر نہیں آتی۔‘‘ یہ بیان ہماچل پردیش کے وزیر اعلیٰ سکھوندر سنگھ سکھو نے مغربی بنگال میں ایک پریس کانفرنس کے دوران دیا ہے۔

https://x.com/INCIndia/status/2045467540298858733?s=20

سکھوندر سکھو نے میڈیا سے مخاطب ہوتے ہوئے کہا کہ ’’مرکز میں بی جے پی کی حکومت ہے، لیکن انھوں نے مغربی بنگال کو کوئی پروجیکٹ نہیں دیا۔ جو بھی بنگال میں پروجیکٹ ہیں، وہ سب کانگریس نے دیے ہیں۔ اس لیے بی جے پی کو ووٹ دینا ریاست کی عوام کے ساتھ ناانصافی ہوگی۔‘‘ پریس کانفرنس کے دوران انھوں نے عوام سے بھی اپیل کی کہ کانگریس امیدواروں کو ووٹ دے کر کامیاب بنائیں، تاکہ ریاست کی ترقی ایک بار پھر شروع ہو سکے اور روزگار کے مواقع بھی پیدا کیے جا سکیں۔