بہار ایس آئی آر: آر جے ڈی اور سی پی آئی ایم ایل نے درج کرائے اعتراضات، الیکشن کمیشن کا وضاحتی بیان

بہار میں ووٹر لسٹ کی خصوصی گہری نظرثانی (ایس آئی آر) کے دوران اپوزیشن جماعتوں نے انتخابی فہرست کی شفافیت پر سوال اٹھاتے ہوئے باضابطہ طور پر اپنے اعتراضات درج کرائے ہیں۔ اس حوالے سے الیکشن کمیشن آف انڈیا (ای سی آئی) نے جمعرات کو اپنا ڈیلی بلیٹن جاری کیا جس میں مختلف جماعتوں کی جانب سے سامنے آئے اعتراضات اور دعووں کی تفصیل دی گئی ہے۔

الیکشن کمیشن کے مطابق، راشٹریہ جنتا دل (آر جے ڈی) نے اس عمل کے دوران 3 اعتراضات درج کرائے ہیں، جبکہ کمیونسٹ پارٹی آف انڈیا (مارکسسٹ-لیننسٹ) لبریشن نے 79 اعتراضات پیش کیے ہیں۔ کمیشن کا کہنا ہے کہ ان اعتراضات کا تصفیہ 7 دن کے اندر مکمل کر لیا جائے گا۔

ای سی آئی نے واضح کیا کہ اعتراضات درج کرانے کی آخری تاریخ قریب ہے اور صرف 4 دن باقی ہیں، اس لیے سیاسی جماعتوں اور شہریوں سے اپیل کی گئی ہے کہ وہ اپنے دعوے اور اعتراضات بروقت درج کرائیں تاکہ کسی بھی نام کو غلطی سے شامل یا خارج نہ کیا جا سکے۔

کمیشن کے مطابق، ایس آئی آر 2025 کے تحت اب تک کل 1,95,802 دعوے اور اعتراضات درج کرائے گئے ہیں۔ ان میں سے 24,991 کیسوں کا تصفیہ کیا جا چکا ہے۔ اسی طرح، 18 سال یا اس سے زائد عمر کے نئے ووٹروں کی جانب سے 8,51,788 فارم 6 (بی ایل اے سمیت) داخل کیے گئے ہیں، جن میں سے 37,050 کیسز نمٹائے جا چکے ہیں۔

قواعد کے مطابق، دائر کیے گئے ہر دعوے اور اعتراض کا نپٹارا صرف متعلقہ الیکشن رجسٹریشن افسر (ای آر او) یا اسسٹنٹ رجسٹریشن افسر (اے آر او) کی جانب سے کیا جائے گا اور یہ عمل امیدوار کی اہلیت کی تصدیق اور 7 دن کی نوٹس مدت مکمل ہونے کے بعد ہی ممکن ہوگا۔

ای سی آئی نے یہ بھی کہا کہ یکم اگست 2025 کو شائع شدہ مسودہ ووٹر لسٹ میں شامل کسی بھی نام کو بغیر مکمل جانچ اور فریقین کی سماعت کے نہیں ہٹایا جائے گا۔

مزید یہ کہ ہٹائے گئے ناموں کی فہرست، وجوہات کے ساتھ، ضلع الیکشن افسر (ڈی ای او) اور ریاستی چیف الیکٹورل آفیسر (سی ای او) کی ویب سائٹ پر ای پی آئی سی نمبر کے ذریعے قابل تلاش شکل میں دستیاب ہے۔ اگر کوئی شخص اس فیصلے سے مطمئن نہیں ہے تو وہ اپنے دعوے کو آدھار کارڈ کی کاپی کے ساتھ دوبارہ پیش کر سکتا ہے۔