بہار ایس ٹی ایف کی گاڑی مدھیہ پردیش میں حادثے کی شکار، 2 جوانوں کی موت، 4 زخمی

گجرات جا رہی بہار ایس ٹی ایف کی گاڑی مدھیہ پردیش کے رتلام میں حادثہ کی شکار ہو گئی ہے۔ اس حادثے میں 2 جوانوں کی موت ہو گئی ہے وہیں 4 دیگر افراد زخمی ہیں۔ رتلام کے اسپتال میں زخمی جوانوں کا علاج کیا جا رہا ہے۔ زخمیوں میں ایک کی حالت سنگین ہونے کی وجہ سے اسے اندور منتقل کر دیا گیا ہے۔

دہلی-ممبئی 8 لین والے اکسپریس میں ہوئے حادثے کی اطلاع ملنے کے بعد رتلام ایس پی امت کمار، اے ایس پی راکیش کھاکھا سمیت پولیس و انتظامیہ کے افسرن فوراً موقع پر پہنچے اور راحت و بچاؤ کام شروع کرتے ہوئے زخمیوں کو علاج کے لیے اسپتال بھجوایا۔

اطلاع کے مطابق اسکارپیو گاڑی میں سوار ایس ٹی ایف کے جوان گجرات کے گاندھی دھام کسی خاص آپریشن کے تحت جا رہے تھے لیکن بیچ میں ہی حادثہ کا شکار ہو گئے۔ حادثے کی وجوہات کی جانچ کی جا رہی ہے۔ اس واقعہ نے ایک بار پھر سلامتی دستوں کی آمد ورفت کے دوران سڑک تحفظ نظام پر بھی سوال کھڑے کر دیئے ہیں۔ مہلوکین کی لاشوں کو پوسٹ مارٹم کے لیے اسپتال بھیج دیا گیا ہے۔

سڑک حادثے میں جان گنوانے والے جوانوں کے نام سب انسپکٹر مکند مراری، کانسٹیبل وکاس کمار ہیں۔ وہیں زخمیوں کے نام سب انسپکٹر سنتوش کمار، کانسٹیبل جیو دھاری کمار، کانسٹیبل متھلیش پاسوان اور کانسٹیبل رنجن کمار ہیں۔