بہار: ’نوجوانوں کی حالت زار کے لیے این ڈی اے قصوروار‘، راہل گاندھی نے اعداد و شمار پیش کر حکومت کو بنایا ہدف تنقید

لوک سبھا میں قائد حزب اختلاف اور کانگریس لیڈر راہل گاندھی نے ایک بار پھر سے بہار کی بی جے پی-جے ڈی یو حکومت پر حملہ بولا ہے۔ راہل گاندھی نے کہا کہ کچھ دنوں قبل بہار کے کچھ نوجوانوں سے میری بات چیت ہوئی تھی۔ بات چیت کا بنیادی موضوع تعلیم، صحت اور روزگار تھا۔ ریاست میں ان سب کی حالت زار کے لیے بی جے پی-جے ڈی یو حکومت ذمہ دار ہے۔ انہوں نے کہا کہ بہار کے نوجوان اس بات سے بخوبی واقف ہیں کہ گزشتہ 20 سالوں میں کس طرح سے اس مودی-نتیش حکومت نے نوجوانوں کی خواہشات کا گلا گھونٹا ہے۔ ریاست کو لاوارث چھوڑ دیا ہے اور ہر اعتبار سے ریاست کو پسماندہ بنا دیا ہے۔

راہل گاندھی نے سوشل میڈیا پلیٹ فارم ’ایکس‘ پر نوجوانوں سے بات چیت کی ایک ویڈیو پوسٹ کرتے ہوئے کچھ اعداد و شمار بھی شیئر کیے ہیں۔ ان اعداد و شمار میں دعویٰ کیا گیا ہے کہ ملک میں تعلیم کے معاملے میں بہار کس مقام پر ہے اور کس طرح سے اس کا گراف مسلسل نیچے کی جانب جا رہا ہے۔ اسی طرح سے روزگار اور صحت کے مسائل کو لے کر بھی اعداد و شمار شیئر کیے گئے ہیں۔ راہل گاندھی کا کہنا ہے کہ یہ صرف اعداد و شمار نہیں ہے بلکہ آئینہ ہے، وہ پیچھے کا آئینہ جو دکھا رہا ہے کہ ڈبل انجن بہار کو ترقی سے کس قدر پیچھے کھینچ لائی ہے۔

راہل گاندھی کی جانب سے پیش کردہ اعداد و شمار کچھ اس طرح ہیں—

تعلیم:

کلاس 10-9 میں ڈراپ آؤٹ کی شرح: 27 واں مقام (29 ریاستوں میں)، کلاس 12-11 میں داخلہ کی شرح: 28 واں مقام (29 ریاستوں میں)، خواتین خواندگی کی شرح: 28 واں مقام (29 ریاستوں میں)۔

روزگار:

خدمات کے شعبے میں ملازمت: 21 واں مقام (29 ریاستوں میں)، صنعتی مینو فیکچرنگ کے شعبے میں ملازمت: 23 واں مقام (29 ریاستوں میں)۔

صحت:

بچوں کی اموات کی شرح: 27 واں مقام (29 ریاستوں میں)، انشورنس پالیسی سے صحت کی سیکورٹی: 29 واں مقام (29 ریاستوں میں)، گھر میں بیت الخلاء کی سہولت: 29 واں مقام (29 ریاستوں میں)۔

انسانی ترقی (ہیومن ڈیولپمنٹ):

ہیومن ڈیولپمنٹ انڈیکس (ایچ ڈی آئی): 27 واں مقام (27 ریاستوں میں)، فی کس آمدنی (این ایس ڈی پی): 25 واں مقام (25 ریاستوں میں)۔

راہل گاندھی کا کہنا ہے کہ میں نے بہار کے جتنے بھی نوجوانوں سے ملاقات کی ہے، تمام بے حد ہونہار اور سمجھدار ہیں۔ نوجوان اپنی قابلیت اور محنت کے بدولت ہر جگہ اپنی چمک بکھیر سکتے ہیں، لیکن حکومت نے انہیں مواقع کی جگہ صرف بے روزگاری اور مایوسی دی ہے۔ ساتھ ہی انہوں نے کہا کہ اب وقت تبدیلی کی ہے، بہار کی عزت نفس کو پھر سے جگانے کا وقت ہے۔ وقت ہے مہاگٹھ بندھن کے انصاف کے عہد کو دہرانے کا۔

واضح رہے کہ بہار اسمبلی انتخاب کے لیے منگل کو مہاگٹھ بندھن نے اپنا انتخابی منشور جاری کر دیا ہے۔ انتخابی منشور کو ’تیجسوی پرن‘ نام دیا گیا ہے۔ وعدہ کیا گیا ہے کہ ریاست میں مہاگٹھ بندھن کی حکومت بننے کے بعد 20 دنوں کے اندر ملازمت کے متعلق ایکٹ لایا جائے گا اور 20 ماہ کے اندر ملازمت فراہم کرنے کا عمل شروع کر دیا جائے گا۔ اس کے علاوہ تعلیم اور صحت سمیت عوامی فلاح و بہبود کے لیے کئی وعدے کیے گئے ہیں۔