بہار انتخاب میں 'مفت کورونا ویکسین' کا وعدہ کر پھنسی بی جے پی، معاملہ پہنچا الیکشن کمیشن!

بہار اسمبلی انتخاب کے لیے جمعہ کو وزیر اعظم نریندر مودی کی ریلی شروع ہونے والی ہے اور اس سے ایک دن قبل بی جے پی نے اپنا انتخابی منشور جاری کرتے ہوئے اقتدار میں آنے پر سبھی بہاری باشندوں کو مفت کورونا ویکسین دینے کا وعدہ کیا ہے۔ اس وعدے پر بی جے پی بری طرح پھنستی ہوئی نظر آ رہی ہے۔ تمام سیاسی پارٹیاں بی جے پی کے اس وعدے پر سوال اٹھا رہی ہیں۔ مفت ٹیکہ کاری کے وعدہ کا معاملہ اب انتخابی کمیشن بھی پہنچ گیا ہے۔

بی جے پی کے اس انتخابی اسٹنٹ پر انتخابی کمیشن کا دروازہ کھٹکھٹاتے ہوئے سماجی کارکن ساکیت گوکھلے نے شکایت درج کرائی ہے۔ شکایت میں انھوں نے کہا ہے کہ بی جے پی کا بہار انتخاب سے قبل مفت ویکسین دستیاب کرانے کا دعویٰ انتخاب کے دوران مرکزی حکومت کی قوتوں کا کھلے طور پر غلط استعمال ہے۔ ایسے میں انتخابی کمیشن کو فوری کارروائی کرنی چاہیے۔

ساکیت گوکھلے نے اپنی شکایت میں کہا ہے کہ یہ اعلان کسی بی جے پی لیڈر کے ذریعہ نہیں بلکہ ملک کی وزیر مالیات نرملا سیتارمن کے ذریعہ کیا گیا ہے جو سوال کھڑے کرتا ہے۔ کیونکہ ابھی تک حکومت ہند کی جانب سے کورونا ویکسین دینے کو لے کر کسی پالیسی کا آفیشیل اعلان نہیں کیا گیا ہے۔ جب کہ کورونا کے سبب ملک کی ہر ریاست کو نقان ہوا ہے اور بہار کی طرح ہی سبھی ریاست میں لوگ اس سے متاثر ہوئے ہیں۔ اس کی سنگینی کو دیکھتے ہوئے الیکشن کمیشن کو فوراً ایکشن لینا چاہیے۔

اس سے قبل کانگریس لیڈر راہل گاندھی نے بھی بی جے پی کے ذریعہ مفت کورونا ویکسین کے وعدے کو لے کر سوال اٹھایا ہے۔ انھوں نے اس اعلان پر طنز کستے ہوئے ٹوئٹ کر کہا ہے کہ "حکومت ہند نے کووڈ ویکسین تقسیم کرنے کا اعلان کر دیا ہے۔ یہ جاننے کے لیے کہ ویکسین اور جھوٹے وعدے آپ کو کب ملیں گے، برائے کرم اپنی ریاست کی انتخابی تاریخ دیکھیں۔"

بہار الیکشن میں مہاگٹھ بندھن کی جانب سے وزیر اعلیٰ امیدوار اور آر جے ڈی لیڈر تیجسوی یادو نے بھی بی جے پی کے اس اعلان پر حملہ کرتے ہوئے کہا کہ کورونا کا ٹیکہ پورے ملک کا ہے، صرف بی جے پی کا نہیں ہے۔ تیجسوی کے علاوہ کانگریس ترجمان رندیپ سرجے والا نے بھی بی جے پی کو تنقید کا نشانہ بنایا ہے۔ سرجے والا نے کہا کہ بہار الیکشن میں بی جے پی لوگوں کو کورونا ویکسین دینے کی بات کر ورغلا رہی ہے۔

واضح رہے کہ بہار انتخاب کے لیے جمعرات کو وزیر مالیات نرملا سیتارمن نے جو انتخابی منشور جاری کیا ہے اس میں کل 11 انتخابی وعدے کیے گئے ہیں جن میں سب سے پہلا وعدہ مفت کورونا ویکسین دینے کا ہے۔ غور طلب ہے کہ بہار میں صرف ایک ہفتے بعد ہی پہلے مرحلے کی ووٹنگ ہونی ہے، ایسے میں بی جے پی کی طرف سے مفت کورونا ویکسین دینے کے وعدہ پر سوال اٹھنے لگے ہیں۔