بہار: رکن اسمبلی امیدوار کے قافلے پر ہوئے حملے میں شہاب الدین کے بیٹے سمیت 8 پر کیس درج

بہار کے سیوان ضلع واقع حسین گنج تھانہ حلقہ میں قانون ساز کونسل الیکشن میں آزاد امیدوار رئیس خان کے قافلے پر کی گئی گولی باری معاملے میں سابق رکن پارلیمنٹ اور زور آور لیڈر رہے شہاب الدین کے بیٹے اسامہ شہاب سمیت 8 لوگوں کے خلاف معاملہ درج کرایا گیا ہے۔ حسین گنج کے تھانہ انچارج رام بالک مہتو نے بدھ کو بتایا کہ رئیس خان کے بیان کی بنیاد پر معاملہ درج کیا گیا ہے جس میں اسامہ شہاب سمیت 8 لوگوں کو نامزد ملزم بنایا گیا ہے۔ انھوں نے بتایا کہ پولیس معاملے کی جانچ کر رہی ہے۔

پیر کی شب رئیس خان اپنے قافلے کے ساتھ اپنے دفتر سے واپس اپنے گاؤں غایث پور لوٹ رہے تھے، تبھی مہول گاؤں کے پاس جرائم پیشوں نے گولی باری شروع کر دی۔ اس دوران ایک بولیرو گاڑی پر سوار ہو کر بارات سے لوٹ رہے سسون گاؤں کے ونود یادو کی موت جرائم پیشوں کی گولی لگنے سے ہو گئی۔ اس واقعہ میں رئیس خان بال بال بچ گئے، لیکن ان کے قافلے میں شامل کئی لوگ گولی لگنے سے زخمی ہو گئے۔

دوسری طرف جنتا دل یو کے سابق رکن اسمبلی شیام بہادر سنگھ نے کہا کہ اس واقعہ کا حساب لیا جائے گا۔ انھوں نے کہا کہ ہمارا بھائی رئیس خان کسی طرح بچ گیا، اس لیے اب حساب تو ضرور لیا جائے گا۔ واضح رہے کہ اس واقعہ کے بعد سیوان کے لوگوں میں دہشت کا ماحول قائم ہو گیا ہے۔ بتایا جا رہا ہے کہ یہ حملے اے کے-47 سے کیے گئے تھے۔