بہار انتخابی نتائج: یکطرفہ جیت سے این ڈی اے میں جشن کا ماحول، مہاگٹھ بندھن میں مایوسی کا عالم

بہار اسمبلی انتخاب کا نتیجہ مہاگٹھ بندھن کے لیے مایوس کن ثابت ہوا ہے۔ این ڈی اے کی پارٹیوں کو اس اسمبلی انتخاب میں یکطرفہ جیت مل گئی ہے، اور وہ تقریباً 200 اسمبلی سیٹوں پر یا تو جیت حاصل کر چکی ہیں یا پھر آگے چل رہی ہیں۔ اس شاندار کامیابی کے بعد این ڈی اے میں جشن کا ماحول ہے۔ جگہ جگہ پٹاخے پھوٹ رہے ہیں اور مٹھائیاں تقسیم کی جا رہی ہیں۔ بی جے پی نے تو 16 نومبر کو بہار کے سبھی ضلع ہیڈکوارٹرس میں جیت کا جشن منانے کا اعلان بھی کر دیا ہے۔

بہار اسمبلی انتخاب میں این ڈی اے کی بہترین کارکردگی پر وزیر اعظم نریندر مودی کا پہلا رد عمل سامنے آ گیا ہے۔ انھوں نے اپنے بیان میں کہا ہے کہ ’’یہ ترقی اور سُشاسن کی جیت ہے۔‘‘ ان کا کہنا ہے کہ ’’یہ سماجی انصاف اور عوامی فلاح کے جذبہ کی جیت ہے۔ بہار کے میرے باشندوں کا بہت بہت شکریہ، جنھوں نے 2025 کے اسمبلی انتخاب میں این ڈی اے کو تاریخی اور حیرت انگیز جیت کا آشیرواد دیا ہے۔ یہ زبردست مینڈیٹ ہمیں عوام کی خدمت کرنے اور بہار کے لیے نئے عزائم کے ساتھ کام کرنے کی طاقت فراہم کرے گا۔‘‘

بہار اسمبلی انتخاب میں این ڈی اے یکطرفہ فتح حاصل کرتی ہوئی دکھائی دے رہی ہے۔ شام 6 بجے تک حاصل ریزلٹ پر نظر ڈالیں تو بی جے پی 37 سیٹوں پر اور جے ڈی یو 24 سیٹوں پر جیت چکی ہے۔ یہ دونوں پارٹیاں بالترتیب 53 اور 59 سیٹوں پر آگے بھی چل رہی ہیں۔ دوسری طرف آر جے ڈی 6 سیٹوں پر جیت حاصل کر چکی ہے اور 20 سیٹوں پر سبقت بنائے ہوئی ہے۔ ظاہر ہے مہاگٹھ بندھن کی سب سے بڑی پارٹی آر جے ڈی کی کارکردگی انتہائی خراب ہے، جبکہ بہار میں سب سے زیادہ سیٹوں پر آر جے ڈی نے ہی اپنے امیدوار کھڑے کیے تھے۔

الیکشن کمیشن سے موصول تازہ رجحانات کے مطابق بہار اسمبلی انتخابات میں این ڈی اے نے اپنی پوزیشن مزید مضبوط کر لی ہے، جبکہ مہاگٹھ بندھن کی نشستیں محدود ہوتی جا رہی ہیں۔
تمام 243 نشستوں کے تازہ اعداد و شمار کے مطابق پارٹی وار صورتِ حال کچھ یوں ہے:

• بی جے پی — 92

• جے ڈی یو — 81

• آر جے ڈی — 26

• ایل جے پی (رام ولاس) — 21

• اے آئی ایم آئی ایم — 6

• کانگریس — 5

• ایچ اے ایم ایس — 5

• راشٹریہ لوک مورچہ — 4

• سی پی آئی (مارکسی) — 1

• سی پی آئی (ایم ایل) — 1

• بی ایس پی — 1

کل نشستیں (رجحانات): 243

این ڈی اے کی مجموعی نشستیں:

• بی جے پی: 92

• جے ڈی یو: 81

• ایل جے پی (رام ولاس): 21

• ایچ اے ایم ایس: 5

این ڈی اے ابھی تک مجموعی طور پر: 199 نشستوں پر آگے

مہاگٹھ بندھن کی مجموعی نشستیں:

• آر جے ڈی: 26

• کانگریس: 5

• سی پی آئی (ایم ایل): 1

• سی پی آئی (مارکسسٹ): 1

مہاگٹھ بندھن: 33 نشستوں کے قریب

این ڈی اے کی 199 لیڈز واضح اکثریت سے کہیں آگے ہیں، جبکہ مہاگٹھ بندھن 33 نشستوں کے آس پاس سِمٹتا دکھائی دے رہا ہے۔ گنتی جاری ہے اور کچھ نشستوں پر مقابلہ سخت ہے، مگر مجموعی تصویر این ڈی اے کے حق میں واضح ہے۔

الیکشن کمیشن نے بہار اسمبلی کی تمام 243 نشستوں کے رجحانات جاری کر دیے ہیں، جن کے مطابق ریاست میں این ڈی اے کی برتری مضبوط ہوتی جا رہی ہے۔ تازہ ترین اعداد و شمار کے مطابق این ڈی اے 188 نشستوں پر آگے ہے، جن میں بی جے پی 84، جے ڈی یو 77، ایل جے پی (رام ولاس) 22، ایچ ایم ایس 5 پر آگے ہے۔

دوسری جانب مہاگٹھ بندھن 51 نشستوں پر آگے دکھائی دے رہا ہے، جن میں آر جے ڈی 35، کانگریس 5، سی پی آئی (ایم-ایل) 7 جبکہ وی آئی پی اور سی پی ایم ایک ایک سیٹ پر آگے ہیں۔ گنتی کا عمل الیکشن کمیشن کی نگرانی میں تیزی سے جاری ہے، اور جیسے جیسے مزید راؤنڈ سامنے آ رہے ہیں، ریاست کی سیاسی تصویر مزید واضح ہوتی جا رہی ہے۔

بہار اسمبلی انتخابات 2025 کی گنتی لگاتار جاری ہے اور تازہ رجحانات کے مطابق این ڈی اے نے ریاست میں مجموعی سبقت مزید مضبوط کر لی ہے۔ نئے اعداد و شمار کے مطابق جے ڈی یو 77 اور بی جے پی 73 نشستوں پر آگے ہے، جبکہ آر جے ڈی 42 حلقوں میں سبقت برقرار رکھے ہوئے ہے۔

مہاگٹھ بندھن کی دیگر جماعتوں میں کانگریس 7 اور سی پی آئی (ایم ایل) 5 نشستوں پر آگے ہیں۔ ایل جے پی (رام ولاس) بھی 18 نشستوں پر مضبوط پوزیشن میں ہے، جبکہ ایچ اے ایم 4 حلقوں میں سبقت حاصل کیے ہوئے ہے۔

ریاستی سطح پر مجموعی تصویر یہ بتا رہی ہے کہ این ڈی اے کی پوزیشن مستحکم ہوتی جا رہی ہے جبکہ مہاگٹھ بندھن کو محدود حلقوں تک حمایت مل رہی ہے۔

بہار اسمبلی انتخابات 2025 کے لیے ووٹوں کی گنتی اپنے اہم مرحلے میں داخل ہو چکی ہے اور تازہ ترین رجحانات میں واضح برتری این ڈی اے کے حق میں جاتی نظر آ رہی ہے۔ متعدد اضلاع سے موصول ہونے والے راؤنڈز میں این ڈی اے مختلف نشستوں پر مضبوط سبقت برقرار رکھے ہوئے ہے، جبکہ مہاگٹھ بندھن محدود حلقوں میں ہی آگے دکھائی دے رہا ہے۔
اعداد و شمار:
این ڈی اے 111 نشستوں پر آگے — بی جے پی 48، جے ڈی یو 47، ایل جے پی (آر وی) 13، ایچ اے ایم ایس 3
مہاگٹھ بندھن 31 نشستوں پر آگے — آر جے ڈی 23، کانگریس 7، وی آئی پی 1
دیگر اور آزاد امیدوار 5 نشستوں پر آگے

این ڈی اے 55 نشستوں پر آگے — بی جے پی 28، جے ڈی یو 20، ایل جے پی (آر وی) 7 پر آگے۔
مہاگٹھ بندھن 21 نشستوں پر آگے — آر جے ڈی 17، کانگریس 3 اور سی پی آئی-ایم ایل ایک سیٹ پر آگے ہے۔

بہار اسمبلی انتخابات 2025 کے لیے ووٹوں کی گنتی کو ایک گھنٹے سے زیادہ گزر چکا ہے اور تمام 243 نشستوں پر گنتی تیزی سے جاری ہے۔ پوسٹل بیلٹ کے بعد اب ای وی ایم کے راؤنڈز سامنے آ رہے ہیں، جن کے ساتھ انتخابی مقابلے کی ابتدائی تصویر بننے لگی ہے۔ مختلف اضلاع سے موصول ہونے والی ابتدائی رپورٹس کے مطابق این ڈی اے نے آغاز میں سبقت قائم کر لی ہے، جبکہ مہاگٹھ بندھن بھی چند نشستوں پر سخت مقابلہ پیش کر رہا ہے۔
سیاسی جماعتوں کے دفاتر میں گہما گہمی بڑھ گئی ہے، اور امیدوار اپنے اپنے گنتی مراکز پر رجحانات پر قریبی نظر رکھے ہوئے ہیں۔ اگلے چند راؤنڈز میں صورتحال مزید واضح ہوتی جائے گی۔

تازہ ترین صورت حال: این ڈی اے 38 نشستوں پر آگے — بی جے پی 20، جے ڈی یو 15، ایل جے پی (آر وی) 3 سیٹ پر آگے۔
مہاگٹھ بندھن 10 نشستوں پر آگے — آر جے ڈی 6، کانگریس 3 اور سی پی آئی-ایم ایل ایک سیٹ پر آگے۔

بہار اسمبلی انتخابات 2025 کی تمام 243 سیٹوں پر ووٹوں کی گنتی صبح 8 بجے سے جاری ہے۔ سب سے پہلے پوسٹل بیلٹ کی گنتی کی گئی ہے، جس میں حسب معمول بی جے پی اور جے ڈی یو کے اتحاد نے برتری حاصل کی۔ اب ای وی ایم کے ووٹوں کی گنتی شروع ہو گئی ہے، جس کے بعد اصل رجحانات سامنے آئیں گے۔

بہار اسمبلی انتخابات 2025 کے نتائج کا اعلان آج کیا جا رہا ہے۔ صبح 8 بجے تمام 46 مراکز پر گنتی شروع ہو چکی ہے۔ سب سے پہلے پوسٹل بیلٹ کی گنتی ہو رہی ہے، جس کے بعد ای وی ایم کے ووٹوں کی گنتی شروع ہوگی۔ حکومت سازی کے لیے کسی بھی جماعت کو 243 میں سے 122 سیٹوں پر اکثریت درکار ہے۔

نتیش کمار نے پورے اعتماد کے ساتھ جیت کا دعویٰ کیا ہے، جبکہ تیجسوی یادو نے 18 نومبر کو حلف لینے کا اعلان بھی کر دیا ہے۔ آج کے نتائج یہ طے کریں گے کہ اقتدار کس کے ہاتھ میں جائے گا اور بہار کی نئی سیاسی کہانی کون لکھے گا۔

اس بار بہار میں ریکارڈ 67.13 فیصد ووٹنگ ہوئی ہے، جو 1951 کے بعد سب سے زیادہ ہے۔ خواتین ووٹرز کی شرکت غیر معمولی رہی اور 71.6 فیصد تک پہنچی۔ الیکشن کمیشن کے مطابق کسی امیدوار یا سیاسی جماعت نے دوبارہ پولنگ کی درخواست نہیں کی۔