سبرنگ ٹرسٹ معاملہ: تیستا سیتلواڑ اور ان کے شوہر کو سپریم کورٹ سے ملی راحت، ضمانت برقرار

این جی او (سبرنگ ٹرسٹ) فنڈ میں گڑبڑی معاملے پر سماجی کارکن تیستا سیتلواڑ اور ان کے شوہر جاوید آنند کو سپریم کورٹ سے بڑی راحت ملی ہے۔ عدالت عظمیٰ پیشگی ضمانت سے متعلق گجرات ہائی کورٹ کے فیصلے میں مداخلت سے انکار کر دیا ہے۔ یعنی سیتلواڑ اور ان کے شوہر کی پیشگی ضمانت برقرار رہے گی۔

سپریم کورٹ نے تیستا سیتلواڑ اور ان کے شوہر جاوید آنند کو دولت کے مبینہ طور پر غلط استعمال کو لے کر ان کے خلاف داخل معاملے میں گجرات پولیس کے ساتھ تعاون کرنے کی ہدایت دی۔ ایڈیشنل سالیسٹر جنرل ایس وی راجو کے یہ کہنے کے بعد کہ دونوں جانچ میں تعاون نہیں کر رہے ہیں، جسٹس ایس کے کول کی صدارت والی تین ججوں کی بنچ نے حکم پاس کیا ہے۔

جسٹس سدھانشو دھولیا اور جسٹس پی کے مشرا کی بنچ نے مذکورہ معاملے میں پیشگی ضمانت دینے کو چیلنج کرنے والی گجرات حکومت کی عرضی کا نمٹارا کرتے ہوئے کہا کہ ابھی تک فرد جرم داخل نہیں کیا گیا ہے۔ اے ایس جی کا ماننا ہے کہ تعاون کی کمی ہے۔ جیسا بھی ہو، جواب دہندہ ضرورت پڑنے پر جانچ میں تعاون کریں گے۔

عدالت عظمیٰ نے سیتلواڑ کی اس عرضی کا بھی نمٹارا کر دیا جس میں گجرات ہائی کورٹ کے ذریعہ 8 فروری 2019 کے فیصلے میں پیشگی ضمانت دیتے وقت کیے گئے تبصرے کو ہٹانے کا مطالبہ کیا گیا تھا۔ بنچ نے ان کی پیشگی ضمانت کو مکمل بناتے ہوئے کہا کہ یہ کہنا غلط ہے کہ ضمانت کے مرحلہ میں کیا گیا کوئی بھی تبصرہ معاملے کی سماعت پر شاید ہی کوئی اثر ڈال سکتا ہے۔ ہمیں اس سے زیادہ کچھ کہنے کی ضرورت نہیں ہے۔

واضح رہے کہ پیسے کی مبینہ ہیرا پھیری کا معاملہ احمد آباد کرائم سیل نے ایک شکایت پر درج کیا تھا جس میں تیستا سیتلواڑ اور آنند پر 2008 اور 2013 کے درمیان اپنے این جی او ’سبرنگ ٹرسٹ‘ کے ذریعہ سے مرکزی حکومت سے دھوکہ دہی سے 1.4 کروڑ روپے کا گرانٹ حاصل کرنے کا الزام عائد کیا گیا تھا۔