پنجاب: عآپ کو لگا زوردار جھٹکا، تین باغی اراکین اسمبلی نے کانگریس کا دامن تھاما

پنجاب کے وزیر اعلیٰ امرiندر سنگھ نے جمعرات کو نئی دہلی میں پارٹی اعلیٰ کمان کے ساتھ میٹنگ سے قبل عآپ کے تین باغی اراکین اسمبلی سکھپال کھیرا، پیرمل سنگھ اور جگدیو سنگھ کملو کو پارٹی میں شامل کیا۔ کانگریس حکمراں ریاست میں اگلے سال مارچ میں اسمبلی الیکشن ہونے کا امکان ہے۔

پنجاب کانگریس نے ٹوئٹ کر جانکاری دی کہ ’’وزیر اعلیٰ کیپٹن امریندر سنگھ نے آج دہلی کے لیے روانہ ہونے سے قبل سکھپال کھیرا رکن اسمبلی اور سابق لیڈر اپوزیشن اور ان کے دو ساتھی عآپ رکن اسمبلی جگدیو سنگھ کملو، رکن اسمبلی مور اور پیرمل سنگھ دھولا، رکن اسمبلی بھدورا کا پارٹی میں استقبال کیا۔‘‘ اس تقریب میں پٹیالہ کی رکن پارلیمنٹ اور وزیر اعلیٰ کی بیوی پرنیت کور بھی موجود رہیں۔

پنجاب کے سیاسی حالاتا پر تبادلہ خیال کے لیے کانگریس کی مرکزی قیادت نے آج وزیر اعلیٰ امریندر سنگھ کو دہلی بلایا تھا۔ وزیر اعلیٰ امریندر سنگھ نے کہا کہ کانگریس صدر سونیا گاندھی نے تینوں اراکین اسمبلی کو شامل کرنے کی منظوری دے دی ہے۔ انھوں نے مزید کہا کہ ’’آل انڈیا کانگریس کمیٹی (اے آئی سی سی) پنجاب کے انچارج ہریش راوت اور ریاستی یونٹ کے سربراہ سنیل جاکھڑ دہلی میں تین رکنی کمیٹی کے ساتھ غور و خوض میں مصروف ہیں۔‘‘

کبھی امریندر سنگھ کی سخت تنقید کرنے والے فائر برانڈ کھیرا نے کانگریس چھوڑ دی تھی اور دسمبر 2015 میں عآپ میں شامل ہو گئے تھے۔ وہ 2017 میں بھولاتھ اسمبلی سیٹ سے منتخب ہوئے تھے۔ حالانکہ پنجاب اسمبلی میں اپوزیشن کے سابق لیڈر کھیرا نے جنوری 2019 میں عآپ کی ابتدائی رکنیت سے استعفیٰ دے دیا تھا اور اپنی خود کی پارٹی ’پنجابی ایکتا پارٹی‘ تشکیل دی تھی۔ دیگر دو اراکین اسمبلی کملو اور دھولا پہلی بار اسمبلی کے رکن بنے تھے۔