بیلاری تشدد: بی جے پی رکن اسمبلی سمیت 11 کے خلاف ایف آئی آر درج، تحقیقات کا حکم جاری

کرناٹک کے بیلاری میں برسراقتدار کانگریس اور بی جے پی اراکین اسمبلی کے حامیوں کے درمیان ہوئے تشدد نے سیاست میں گرمی پیدا کر دی ہے۔ بینر لگانے کے معاملہ پر شروع ہوئے تصادم کے بعد بی جے پی رکن اسمبلی جناردھن ریڈی سمیت 11 لوگوں کے خلاف ایف آئی آر درج کی گئی ہے۔ اس درمیان ریاست کے وزیر داخلہ جی. پرمیشور نے بتایا کہ تشدد و تصادم کے واقعہ کے بعد تحقیقات کا حکم جاری کر دیا گیا ہے۔

بیلاری میں ہوئے تشدد معاملہ پر وزیر داخلہ پرمیشور نے کہا کہ ’’کل بیلاری میں جناردھن ریڈی کے ایک گروپ اور مقامی رکن اسمبلی نارا بھرت ریڈی کے دوسرے گروپ کے درمیان ایک پوسٹر لگانے سے متعلق مسئلہ پر تصادم ہو گیا، جو مہرشی والمیکی کی مورتی کے افتتاح سے جڑا تھا۔ کانگریس رکن اسمبلی بھرت ریڈی کے حامیوں نے بینر لگائے جبکہ جناردھن ریڈی کے حامیوں نے ان پوسٹر کو ہٹا دیا۔‘‘ انھوں نے مزید کہا کہ پوسٹر کو ہٹائے جانے سے لوگ مشتعل ہو گئے اور ایک دوسرے پر پتھر پھینکنے لگے۔ تصادم میں ایک شخص کی موت ہو گئی۔ اس معاملے کی جانچ کا حکم دے دیا گیا ہے۔

جی. پرمیشور کے مطابق ’’مجھے بتایا گیا ہے کہ اس معاملہ میں ہوئی ایف آئی آر میں 11 لوگوں کے نام درج کیے گئے ہیں، جبکہ کچھ لوگوں کو گرفتار بھی کیا گیا ہے۔‘‘ انھوں نے یہ بھی کہا کہ جب پوری رپورٹ آ جائے گی تو وہ میڈیا کے ساتھ درست جانکاری شیئر کریں گے۔

دوسری طرف تصادم کے بعد پیدا حالات اور کارروائی کے بارے میں پولیس نے بتایا کہ شہر میں والمیکی کے مجسمہ کی رونمائی پروگرام سے قبل بینر لگانے کو لے کر ہوئے پُرتشدد تصادم کو لے کر آج جمعہ کو بی جے پی رکن اسمبلی جناردن ریڈی اور 10 دیگر کے خلاف ایف آئی آر درج کی گئی۔ انھوں نے یہ بھی بتایا کہ بی جے پی رکن اسمبلی جناردن ریڈی اور کانگریس رکن اسمبلی بھرت ریڈی کے حامیوں میں تصادم کے ایک دن بعد بیلاری میں حالات پرامن ہیں، لیکن وہاں سیکورٹی بڑھا دی گئی ہے۔

بیلاری میں یہ تصادم 3 جنوری کو شہر میں ہونے والی والمیکی کے مجسمہ کی رونمائی تقریب سے عین قبل ہوا۔ پولیس کا کہنا ہے کہ بھرت ریڈی کے حامی جناردن ریڈی کے گھر کے سامنے پوسٹر لگانے کی کوشش کر رہے تھے، جس کے بعد ان کے حامیوں نے مخالفت کی اور اس وجہ سے تلخ بحث ہو گئی۔ بحث نے جھگڑے کی شکل اختیار کی، اور پھر یہ مار پیٹ میں تبدیل ہو گئی۔ تصادم میں دونوں فریقین کے حامیوں نے مبینہ طور پر خوب پتھراؤ کیا۔ پولیس ذرائع نے بتایا کہ حالات کو قابو میں کرنے کے لیے موقع پر پہنچے پولیس اہلکاروں پر بھی پتھر پھینکے گئے۔ اس واقعہ میں کئی لوگ زخمی بھی ہوئے۔