بالاسور کی طالبہ کی موت پر راہل گاندھی کا بیان- ’یہ خودکشی نہیں، بی جے پی کے نظام کے ذریعے قتل ہے‘

اوڈیشہ کے بالاسور میں جنسی ہراسانی کے بعد خودسوزی کرنے والی 20 سالہ طالبہ کی ایمس بھونیشور میں موت کے بعد قومی سیاست میں ہلچل مچ گئی ہے۔ اس واقعے پر راہل گاندھی نے بی جے پی پر براہِ راست حملہ کرتے ہوئے اسے ’نظام کے ذریعے کی گئی منظم قتل‘ قرار دیا ہے۔

یہ طالبہ فقیر موہن آٹونومس کالج، بالاسور میں بی ایڈ کے دوسرے سال کی طالبہ تھی، جس نے شعبۂ تعلیم کے سربراہ سمیر کمار ساہو پر طویل عرصے سے جنسی اور ذہنی ہراسانی کا الزام لگایا تھا۔ شکایت کے باوجود، نہ صرف ملزم کے خلاف کوئی کارروائی نہیں ہوئی بلکہ طالبہ کو ہی مسلسل دھمکیاں دی گئیں اور اس کی شکایت کو غیر سنجیدگی سے لیا گیا۔

راہل گاندھی نے سوشل میڈیا پلیٹ فارم ’ایکس‘ پر بیان دیتے ہوئے کہا، ’’اڈیشہ میں انصاف کے لیے لڑتی ایک بیٹی کی موت، سیدھے سیدھے بی جے پی کے نظام کے ذریعے کی گئی قتل ہے۔‘‘

انہوں نے مزید لکھا، ’’اس بہادر طالبہ نے جنسی ہراسانی کے خلاف آواز اٹھائی لیکن انصاف دینے کے بجائے اسے بار بار دھمکایا، ذلیل کیا گیا۔ جنہیں اس کی حفاظت کرنی تھی، وہی اسے توڑتے رہے۔ ہر بار کی طرح بی جے پی کا نظام ملزمان کو بچاتا رہا ہے اور ایک معصوم بیٹی کو خود کو آگ لگانے پر مجبور کر دیا۔ یہ خودکشی نہیں، بلکہ نظام کے ذریعے کیا گیا قتل ہے۔‘‘

راہل گاندھی نے وزیر اعظم مودی کی خاموشی پر بھی سوال اٹھاتے ہوئے کہا، ’’مودی جی، چاہے اڈیشہ ہو یا منی پور، ملک کی بیٹیاں جل رہی ہیں، ٹوٹ رہی ہیں، دم توڑ رہی ہیں۔ اور آپ؟ خاموش بیٹھے ہیں۔ ملک کو آپ کی خاموشی نہیں، جواب چاہیے۔ بیٹیوں کو تحفظ اور انصاف چاہیے۔‘‘

یاد رہے کہ طالبہ نے 11 جولائی کو کالج کیمپس میں خود کو آگ لگا لی تھی۔ اسے پہلے بالاسور کے ضلعی اسپتال اور بعد میں شدید حالت کے باعث ایمس بھونیشور منتقل کیا گیا تھا، جہاں 14 جولائی کی رات 11:46 پر اس کی موت واقع ہوئی۔ ایمس کی رپورٹ کے مطابق، طالبہ کو وینٹی لیٹر پر رکھا گیا تھا اور تمام ممکنہ علاج کے باوجود وہ بچ نہیں سکی۔ اس معاملے میں پولیس نے ایچ او ڈی سمیر ساہو اور کالج کے پرنسپل دلیپ گھوش کو گرفتار کر لیا ہے اور دونوں کو 14 روزہ عدالتی حراست میں بھیجا گیا ہے۔

اس واقعے نے ریاست اور ملک بھر میں غصے کی لہر دوڑا دی ہے۔ جہاں ایک طرف سیاسی جماعتیں حکومت سے جوابدہی مانگ رہی ہیں، وہیں سوشل میڈیا پر بھی بی جے پی حکومت کے خلاف شدید ردعمل دیکھا جا رہا ہے۔ کانگریس پہلے ہی واقعے کی عدالتی جانچ اور وزیر اعلیٰ موہن مانجھی سے استعفیٰ کا مطالبہ کر چکی ہے۔