آسام: 16 اپوزیشن جماعتوں نے کیا زوبین گرگ کی موت کی عدالتی تحقیقات کا مطالبہ

گوہاٹی: آسام کی 16 اپوزیشن جماعتوں نے گوہاٹی میں مشترکہ اجلاس کے دوران معروف گلوکار اور ثقافتی شخصیت زوبین گرگ کی موت کی عدالتی تحقیقات کا مطالبہ کیا ہے۔ یہ اجلاس رائجور پارٹی کے رکن اسمبلی اکھیل گوگوئی کی قیادت میں منعقد ہوا۔

خیال رہے کہ زوبین گرگ کی 19 ستمبر کو سنگاپور میں اسکوبا ڈائیونگ کے دوران ڈوبنے سے موت ہو گئی تھی۔ وہ نارتھ ایسٹ انڈیا فیسٹیول میں پرفارم کرنے گئے تھے۔ سنگاپور پولیس نے موت کی وجہ ڈوبنا قرار دی لیکن آسام میں کچھ حلقوں نے شبہ ظاہر کیا اور دوسری مرتبہ پوسٹ مارٹم کرایا گیا۔

اجلاس میں تمام جماعتوں نے اتفاق کیا کہ زوبین گرگ کی موت کی عدالتی تحقیقات، فیسٹیول منتظمین کے مالی معاملات کی جانچ اور ایک پارلیمانی سطح کی تمام جماعتوں کا اجلاس طلب کیا جائے۔ اکھیل گوگوئی نے بتایا کہ 19 اکتوبر کو ریاست بھر میں فنکاروں اور شہریوں کے ساتھ ریلیاں اور یادگار پروگرام منعقد ہوں گے۔

سی پی آئی ایم کے رکن اسمبلی منورنجن تعلق دار نے زور دیا کہ تحقیقات اعلیٰ عدالت کی نگرانی میں 90 دن کے اندر مکمل ہونی چاہیے، ورنہ یہ غیر منصفانہ شمار کی جائے گی۔ ان کا کہنا تھا کہ حکومت توجہ ہٹانے کی کوشش کر رہی ہے۔

کانگریس کے رہنما عبدالخالق نے کہا کہ خاندان کی خواہش کے مطابق تیز رفتار عدالتی تحقیقات ہونی چاہیے، جس میں مالی پہلو بھی شامل ہوں۔ انہوں نے اعلان کیا کہ 19 اکتوبر کو عوامی یادگار اجتماع ہوگا۔ شیوسینا آسام کے صدر رام نارائن سنگھ نے الزام لگایا کہ حکومت نے جسد خاکی کو سنبھالنے میں غفلت برتی اور وہ اس ضمن میں اعلیٰ عدالت میں درخواست دائر کریں گے۔

یہ پہلا مشترکہ اپوزیشن اجلاس ہے جس میں زوبین گرگ کی موت کے بعد 19 اکتوبر کو ریاستی سطح پر احتجاج اور یادگار پروگرام کا اعلان کیا گیا۔ خیال رہے کہ زوبین گرگ نے 40 مختلف زبانوں میں گانے گائے اور ’یا علی‘ جیسے مشہور گانوں سے قومی شہرت حاصل کی۔ ان کی موت کے بعد آسام میں غم کی لہر دوڑ گئی ہے اور مختلف سماجی و ثقافتی حلقے ان کے انتقال پر غمزدہ ہیں۔