بی جے پی چھوڑ لولی کی کانگریس میں واپسی

نئی دہلی: دہلی کے سابق وزیر اور دہلی کانگریس کے سابق صدر اروندر سنگھ لولی آج واپس کانگریس میں شامل ہو گئے۔ اروندر سنگھ لولی دہلی کے تیز طرار سیاسی رہنماؤ ں میں سےہیں لیکن کارپوریشن انتخابات سے قبل وہ کانگریس چھوڑ کر بی جے پی میں شامل ہو گئے تھے۔ اس وقت کانگریس چھوڑنے کی وجہ سے کارپوریشن انتخابات میں کانگریس کو نقصان ہوا تھا۔

اروندر سنگھ لولی اجے ماکن کے بہت قریب ہوا کرتے تھے لیکن جب اجے ماکن کو دہلی پردیش کانگریس کمیٹی کا صدر بنایا گیا تو وہ ناراض ہو گئے تھے اور ان کے کانگریس چھوڑنے کی ایک وجہ یہ بھی بتائی جاتی ہے۔ دہلی کانگریس میں گزشتہ کئی دنوں سے کچھ واضح تبدیلیاں نظر آ رہی ہیں۔

حال ہی میں سابق وزیر اعلی شیلا دکشت اور دہلی کانگریس کے صدر اجے ماکن کے درمیان بھی اختلافات دور ہوتے نظر آ رہےہیں۔ عام آدمی پارٹی حکومت کے تین سال پورے ہونے پر دونوں رہنماؤں نے ایک ساتھ میڈیا سے خطاب کیا تھا۔ لولی کی واپسی کی خبر سے دہلی کانگریس میں زبردست خوشی کا ماحول ہے۔ ادھران کی واپسی سے دہلی کی سیاست میں ہلچل پیدا ہو گئی ہے۔