پٹنہ ہوائی اڈہ کو پھر بم سے اڑانے کی دھمکی، چپّے چپّے کی لی گئی تلاشی، سکیوریٹی ایجنسیاں الرٹ

پٹنہ ہوائی اڈہ کو ایک بار پھر بم سے اڑانے کی دھمکی ملی ہے۔ ایک مہینے میں یہ دوسرا موقع ہے جب ہوائی اڈہ کو اڑانے کی دھمکی ملی ہے۔ دھمکی کی خبر ملتے ہی افرا تفری مچ گئی، جس کے بعد پورے ہوائی اڈہ پر تحفظ کے سخت انتظامات کر دیے گئے۔ اس بار پٹنہ ہوائی اڈہ کے نئے ٹرمینل عمارت سمیت پورے احاطہ کو اڑانے کی دھمکی دی گئی۔ حالانکہ سیکوریٹی ایجنسیاں پوری طرح مستعد ہیں اور پٹنہ ہوائی اڈہ کی تمام سرگرمیوں پر نظربنائے ہوئی ہیں۔

’پربھات خبر‘ کی اطلاع کے مطابق ہوائی اڈہ کے ڈائرکٹر کو جمعہ کی رات تقریباً 9:50 بجے ایک میل آیا، اسی میل میں بم سے اڑانے کی دھمکی دی گئی تھی۔ میل کا ذرائع pk_nawas@outlook.com بتایا گیا ہے۔ جیسے ہی یہ اطلاع ہوائی اڈہ انتظامیہ کو ملی، بم اسکواڈ اور سلامتی دستوں کو فوراً الرٹ کر دیا گیا اور پٹنہ ہوائی اڈہ کے چپّے-چپّے کی گہرائی سے تلاشی لی گئی۔

ادھر بم سے پٹنہ ہوائی اڈہ کو اڑانے کی دھمکی ملنے کے بعد بی ٹی اے سی کی میٹنگ دیر رات کی گئی۔ پورے معاملے کو سنجیدگی سے لیا گیا اور گھنٹے بھر چلی میٹنگ میں کمیٹی نے اس دھمکی کو ’غیر مخصوص‘ قرار دیا۔ حالانکہ سبھی متعلقہ حصہ داروں کو ضروری تحفظاتی اقدامات کے لیے حکم جاری کیا گیا۔

دھمکی بھرے میل کے بعد پٹنہ ہوائی اڈہ پر مسافروں اور ان کے سامان پر سخت نگاہ رکھی جا رہی ہے۔ اس کے ساتھ ہی ہوائی اڈہ احاطہ کی نگرانی کو مضبوط کرنے کے لیے اضافی سیکوریٹی اہلکاروں کی تعیناتی کی گئی ہے۔ ساتھ ہی ایئر لائنس، گراؤنڈ ہینڈلنگ اسٹاف اور دیگر معاون ایجنسیوں کے ساتھ سبھی متعلقہ لوگوں کو مستعد رہنے اور ضروری حفاظتی اقدامات کرنے کی ہدایت دی گئی ہے۔

اس دھمکی کو لے کر ہوائی اڈہ انتظامیہ نے ہوائی اڈہ تھانے میں شکایت درج کرائی ہے۔ سائبر سیل کی مدد لی جا رہی ہے تاکہ میل بھیجنے والے کی شناخت ہو سکے۔ واضح رہے کہ اس سے پہلے 30 جون کو بھی پٹنہ ہوائی اڈہ کو بم سے اڑانے کی دھمکی ملی تھی۔ جس کے بعد سے ہی تحفظ کے انتظامات سخت کر دیے گئے تھے۔