اے ایم پی نے 100 شہروں میں روزگار میلہ کا انعقاد کر تاریخ رقم کی

نئی دہلی: ایسوسی ایشن آف مسلم پروفیشنلز (AMP) نے ایک دن میں ملک کے 100 شہروں میں روز گار میلے کا انعقاد کر کے تاریخ رقم کر دی ہے۔ روزگار میلے میں ملک بھر کے 30000 سے زائد اُمیدواروں نے جاب کیلئے رجسٹریشن کروایا۔ AMP اور BBE کے اشتراک سے روزگار میلہ کا اہتمام جامعہ ہمدرد دہلی میں کیا گیا، جس کا افتتاح دہلی حکومت میں وزیر عمران حسین نے فیتہ کاٹ کر کیا۔

اس موقع پر عمران حسین نے روزگار میلہ کے منتظمین کی تعریف کی اور آنے والی کمپنیوں کے تمام اسٹالز کا دورہ کرتے ہوئے نوجوانوں سے بات چیت بھی کی۔ دہلی اقلیتی کمیشن کے چیئرمین ذاکر خان، ہمدرد گروپ سے ساجد احمد، جامعہ ہمدرد کے وائس چانسلر افشار عالم، رجسٹرار سعود اختر، بی ای بی کے شوکت مفتی اور اے ایم پی کے فاروق صدیقی بھی اس موقع پر موجود تھے۔

عبدالرزاق شیخ، ہیڈ آف پروجیکٹس AMP نے کہا کہ یہ روزگار میلہ AMP کیلئے بڑی کامیابی ہے۔ یہ ہماری 15 سالہ تاریخ میں پہلی بار ہوا ہے کہ ہم نے بیک وقت پورے ہندوستان میں اتنی زیادہ جاب ڈرائیو کئے ہیں۔ اس سے موجودہ بے روزگاری کو دور کرنے میں مدد ملے گی اور ملک کی تعمیر و ترقی کی راہیں مزید ہموار ہوں گی۔ انہوں نے کہا کہ روزگار میلہ کو کامیاب بنانے میں تمام این جی اوز پارنٹرز کا اہم رول رہا ہے۔

اے ایم پی این جی او کنیکٹ کے سربراہ فاروق صدیقی نے بتایا کہ جب میں نے پورے ملک میں بیک وقت روز گار میلہ کے انعقاد کے تصور کے بارے میں سوچا تو مجھے اس کی کامیابی کا پورا یقین تھا کیونکہ بے روزگاری کی شرح بہت زیادہ ہے اور چھوٹے شہروں میں کارپوریٹس تک ہماری رسائی ہے۔ انھوں نے مزید کہا کہ 30,000سے زائد امیدواروں اور 600 سے زائد کارپوریٹس کا رجسٹریشن قابل ستائش ہے۔ مجھے خوشی ہے کہ ہماری NGO پارٹنرز اور مقامی AMP چیپٹر اس موقع پر پہنچے اور اس بات کو یقینی بنایا کہ وہ کارپوریٹس کو آرام دہ بنانے اور ہر امیدوار کو ملازمت کے انٹرویو کا موقع فراہم کرنے میں کوئی کسر نہیں چھوڑیں گے۔

فاروق صدیقی نے کہا کہ اس پورے پروگرام کو کامیابی کے ساتھ منعقد کرنے میں ہماری چیپٹر ٹیموں اور تمام مختلف شہروں کی پارٹنر این جی اوز، مختلف تنظیموں اور امن و امان میں مدد کے لیے مقامی انتظامیہ اور پولیس کے تعاون کے بغیر ممکن نہیں تھا۔ فاروق صدیقی نے بتایا کہ جن اُمیدواروں نے پہلے سے رجسٹریشن کرایا تھا انہیں آن لائن پری جاب ڈرائیو ایمپلائبلٹی ٹریننگ میں شرکت کے لیے مدعو کیا گیا تھا تاکہ وہ جاب ڈرائیو کے دن انٹرویو کے لیے تیار ہو جائیں۔ نیز، شارٹ لسٹ کیے گئے اُمیدواروں کو مزید آن لائن ٹریننگ دی جائے گی تاکہ وہ اپنے جاب انٹرویو میں کامیاب ہو سکیں۔

اے ایم پی ایمپلائمنٹ اسسٹنس سیل کے سربراہ شاہد حیدر نے کہا کہ ریکروٹمنٹ انڈسٹری کی تاریخ میں پہلی بار اس طرح کا میگا ایونٹ منعقد کیا گیا ہے۔ یہ ہماری ٹیم کے لیے ایک نیا اور چیلنجنگ اقدام تھا اور اس کا سارا کریڈٹ ٹیم کو جاتا ہے۔ اس عظیم روزگار میلہ کو کامیاب بنانے میں مرزا مبین بیگ، امتیاز شیخ، منظر حسین، کلیم اختر اور امتیاز سید پیش پیش رہے۔