اکھلیش یادو کی ’اخلاقیات‘ نے بی جے پی لیڈروں کو دکھایا راستہ! برجیش پاٹھک، کیشو موریہ اور اپرنا پہنچے اسپتال

اترپردیش کے سابق وزیراعلیٰ اور سماج وادی پارٹی (ایس پی) کے صدر اکھلیش نے انہوں نے منگل کو ایک بار پھر کچھ ایسا کیا کہ حکمراں بی جے پی کے لیڈر ایک کے بعد ایک اسپتال پہنچنے لگے۔ یہ موقع بھارتیہ جنتا پارٹی (بی جے پی) کی ایم ایل اے انوپما جیسوال کی عیادت کا تھا جو لکھنؤ کے میدانتا اسپتال میں داخل ہیں۔ خبر ملتے ہی اکھلیش یادوان کی خیریت دریافت کرنے اچانک اسپتال پہنچ گئے۔ بتا دیں کہ انوپما جیسوال وہی بی جے پی ایم ایل ہیں جنہیں سماج وادی پارٹی کا جھنڈا جلانے کے دوران جھلسنے سے کافی زخم آئے تھے۔

ایس پی سربراہ اکھلیش یادو کے اس اقدام نے سبھی کو حیران کر دیا۔ جیسے ہی ان کی تصویریں سوشل میڈیا پر وائرل ہوئیں، اس کے بعد بی جے پی کے لیڈروں کی بھی آنکھیں کھل گئیں اور پھر کیا تھا اسپتال میں ان سے ملنے والوں کی لائن لگ گئی۔ اکھلیش یادو کے ’نقش قدم‘ پر چلتے ہوئے اترپردیش کے نائب وزیراعلیٰ برجیش پاٹھک، کیشو پرساد موریہ، اوم پرکاش راج بھر، اپرنا یادو اور دیگر بی جے پی ایم ایل اے سے ملنے اسپتال پہنچ گئے۔

 اکھلیش یادو نے منگل کو اپنے سوشل میڈیا اکاؤنٹ ’ایکس‘ پر انوپما جیسوال سے ملاقات کی تصاویر پوسٹ کیں۔ اس وقت وزیر اعلیٰ یوگی آدتیہ ناتھ سمیت دونوں نائب وزرائے اعلیٰ اور کئی وزراوارانسی میں وزیراعظم نریندر مودی کے ’ناری شکتی وندن‘ پروگرام میں تھے۔ اکھلیش یادو کی تصویروں نے ریاست میں سیاسی ہلچل مچا دی ہے۔ بی جے پی کیمپ میں بے چینی کا اندازہ اس بات سے لگایا جاسکتا ہے کہ وارانسی سے واپسی پر نائب وزیراعلیٰ برجیش پاٹھک سب سے پہلے میدانتا اسپتال گئے اور بی جے پی ایم ایل اے سے ملاقات کرکے ان کی خیریت دریافت کی۔ ان کی تصویریں کل رات 10 بجے منظر عام پر آئیں اور اس کے  10:27 بجے کیشو پرساد موریہ بھی ان سے ملنے پہنچ گئے۔

یوپی ریاستی خواتین کمیشن کی نائب صدر اپرنا یادو نے بھی منگل کو اسپتال میں انوپما جیسوال کی عیادت کی۔ انہوں نے رات گئے واقعے کی تصاویر بھی شیئر کیں۔ اوم پرکاش راج بھر نے بھی اسپتال میں ان کی عیادت کی۔ واضح رہے کہ انوپما جیسوال مسلسل دوسری بار بہرائچ کے صدر اسمبلی حلقہ سے ایم ایل اے منتخب ہوئی ہیں۔ ہفتہ کے روز بی جے پی کی جانب سے منعقد خواتین ریزرویشن بل کی حمایت میں اپوزیشن جماعتوں کے خلاف احتجاج میں حصہ لیا تھا۔ اسی دوران جب وہ اپوزیشن پارٹیوں کے لیڈروں کے پتلے نذر آتش کررہی تھیں تبھی آگ سے ان کا چہرہ جھلس گیا تھا۔ انوپما بعدازاں جیسوال کو لکھنؤ کے میدانتا اسپتال میں بھرتی کرایا گیا تھا جہاں ان کا علاج چل رہا ہے۔