اگنی ویر بھرتی امتحان کے لیے سیمپل پیپر آن لائن دستیاب

ہمیرپور (ہماچل پردیش): فوج میں ملازمت حاصل کرنے کے خواہشمند امیدواروں کی سہولت کے لیے فوج نے اگنی ویر بھرتی امتحان کی تیاری کے لیے سیمپل پیپر آن لائن دستیاب کرایا ہے۔ ہمیر پور میں آرمی ریکروٹمنٹ آفس کے ڈائریکٹر کرنل سنجیو کمار تیاگی نے اتوار کو کہا کہ اگنی ویر بھرتی امتحان کے لیے 15 مارچ تک آن لائن درخواستیں طلب کی گئی ہیں۔ آن لائن امتحان 17 اپریل سے 30 اپریل تک ملک بھر کے 176 مراکز پر منعقد کیا جائے گا۔

سنجیو کمار تیاگی نے کہا کہ امیدواروں کی سہولت کے لیے ویب سائٹ پر خصوصی لنکس دستیاب کرائے گئے ہیں جس میں درخواست کے عمل کے بارے میں ویڈیوز کے ذریعے معلومات دی گئی ہیں۔ نیز امتحان کی آن لائن تیاری کے لیے سیمپل پیپر بھی اپ لوڈ کیے گئے ہیں۔ امیدوار گھر بیٹھے ان سیمپل پیپرز کے ذریعے امتحان کی تیاری کر سکتے ہیں۔ فوجی اہلکار نے بتایا کہ درخواستوں اور دیگر طریقہ کار سے متعلق معلومات کے لیے ہیلپ ڈیسک بھی قائم کیے گئے ہیں۔