عام آدمی پارٹی میں تبدیلیاں، منیش سسودیا پنجاب کے انچارج، سوربھ بھاردواج کو دہلی کی کمان

نئی دہلی: عام آدمی پارٹی (عآپ) نے دہلی اسمبلی انتخابات میں شکست کے بعد تنظیمی سطح پر بڑی تبدیلیاں کی ہیں۔ سابق نائب وزیر اعلیٰ منیش سسودیا کو پنجاب کا انچارج مقرر کیا گیا ہے، جبکہ ستیندر جین کو معاون انچارج بنایا گیا ہے۔ دہلی میں پارٹی کی کمان اب سوربھ بھاردواج کے ہاتھوں میں ہوگی، جو گوپال رائے کی جگہ لیں گے۔

پارٹی نے دیگر ریاستوں میں بھی اہم تقرریاں کی ہیں۔ گجرات میں گوپال رائے کو انچارج اور درگیش پاٹھک کو معاون انچارج بنایا گیا ہے۔ گوا میں پنکج گپتا انچارج ہوں گے، جبکہ انکش نارنگ، آبھاس چندیلا اور دیپک سنگلا کو معاون انچارج مقرر کیا گیا ہے۔ چھتیس گڑھ میں سندیپ پاٹھک کو انچارج کی ذمہ داری دی گئی ہے۔

پنجاب کا انچارج بننے پر منیش سسودیا نے کہا کہ ریاست میں عآپ حکومت عوامی فلاح و بہبود کے لیے کام جاری رکھے گی اور پارٹی کارکنان کو پارٹی کا حصہ ہونے پر فخر محسوس ہوگا۔ انہوں نے کہا کہ پنجاب کے لوگ اروند کیجریوال اور وزیر اعلیٰ بھگونت مان کا احترام کرتے ہیں۔

دہلی میں شکست کے بعد عام آدمی پارٹی نے آتشی کو اپوزیشن لیڈر کے طور پر بڑی ذمہ داری سونپی ہے۔ وہ بی جے پی کی قیادت والی دہلی حکومت کے خلاف پارٹی کی سیاسی حکمت عملی تیار کریں گی۔ تاہم، دہلی یونٹ کے تنظیمی امور اور پارٹی توسیع کا کام اب بھی گوپال رائے کرتے رہیں گے۔