سیپٹک ٹینک حادثات: کھلے نالوں اور خستہ حال عمارتوں پر عام آدمی پارٹی کا ردعمل، سخت قانون کا مطالبہ

نئی دہلی: دہلی میں مسلسل پیش آنے والے حادثات اور حفاظتی معیارات کی خلاف ورزیوں پر عام آدمی پارٹی نے حکومت کو سخت تنقید کا نشانہ بناتے ہوئے مطالبہ کیا ہے کہ سیپٹک ٹینکوں کی دستی صفائی، کھلے نالوں اور خستہ حال عمارتوں جیسے سنگین مسائل سے نمٹنے کے لیے سخت قوانین نافذ کیے جائیں اور ذمہ دار افسران و اداروں کے خلاف بلاامتیاز کارروائی کی جائے۔

پارٹی کے رہنماؤں نے کہا کہ راجدھانی میں حفاظتی انتظامات کی مسلسل نظراندازی کے باعث قیمتی جانیں ضائع ہو رہی ہیں، لیکن متعلقہ ادارے مؤثر اقدامات کرنے میں ناکام ثابت ہوئے ہیں۔ ان کا کہنا تھا کہ قوانین موجود ہونے کے باوجود ان پر عمل درآمد نہ ہونے سے ایسے المناک واقعات بار بار پیش آ رہے ہیں۔

میونسپل کارپوریشن کے کرول باغ زون کے چیئرمین پونیت رائے نے منڈکا میں پیش آنے والے حالیہ حادثے کا حوالہ دیتے ہوئے بتایا کہ ایک فیکٹری کے سیپٹک ٹینک کی دستی صفائی کے دوران تین مزدور زہریلی گیس کے باعث دم گھٹنے سے ہلاک ہو گئے۔ انہوں نے کہا کہ پہلے چاند نامی مزدور ٹینک میں اترا، جس کے پھنس جانے پر اسے بچانے کے لیے ارون اور بعد میں سندیپ اندر گئے، مگر تینوں اپنی جان سے ہاتھ دھو بیٹھے۔

پونیت رائے نے کہا کہ قانون کے تحت سیپٹک ٹینکوں کی دستی صفائی پر پابندی عائد ہے، اس کے باوجود یہ کام بدستور جاری ہے۔ ان کے مطابق اس سے قبل نریلا، دہلی جل بورڈ کے سیور اور نیو اشوک نگر میں بھی اسی نوعیت کے جان لیوا حادثات پیش آ چکے ہیں، مگر ہر بار صرف مقدمہ درج کرکے کارروائی مکمل سمجھ لی جاتی ہے۔ انہوں نے مطالبہ کیا کہ تمام فیکٹریوں اور صنعتی اکائیوں کا جامع معائنہ کرایا جائے تاکہ مستقبل میں ایسے سانحات کی روک تھام ممکن ہو سکے۔

کارپوریشن کے کونسلر راکیش جوشی نے نریلا میں کھلے نالے میں گر کر ایک شخص کی ہلاکت کا معاملہ اٹھاتے ہوئے کہا کہ مقامی باشندے طویل عرصے سے نالے کو ڈھانپنے کا مطالبہ کر رہے تھے۔ ان کے بقول مقامی کونسلر نے متعدد مرتبہ متعلقہ حکام کو شکایات اور ویڈیوز بھی ارسال کیں، مگر کوئی مؤثر کارروائی نہیں کی گئی۔

انہوں نے کہا کہ ماضی میں بھی کئی بچے اور جانور اسی نالے میں گر چکے ہیں، جبکہ برسات کے موسم میں شہر کے مختلف علاقوں میں کھلے نالے مزید خطرناک صورت اختیار کر لیتے ہیں۔ انہوں نے ساکیت، مالویہ نگر اور کراول نگر سمیت مختلف علاقوں میں خستہ حال عمارتوں کے گرنے کے واقعات کا ذکر کرتے ہوئے مطالبہ کیا کہ پورے دہلی میں خطرناک عمارتوں کا فوری سروے کرایا جائے، غیر محفوظ عمارتوں کے خلاف کارروائی کی جائے اور کھلے نالوں، خراب سڑکوں اور جل بھراؤ کے مسائل کے مستقل حل کے لیے جامع مہم چلائی جائے۔

عام آدمی پارٹی نے کہا کہ حفاظتی انتظامات میں مسلسل لاپروائی شہریوں کی جانوں کے لیے خطرہ بن چکی ہے۔ پارٹی نے مرکزی حکومت، دہلی حکومت اور میونسپل کارپوریشن سے مطالبہ کیا کہ حفاظتی معیارات کو اولین ترجیح دیتے ہوئے سخت قوانین نافذ کیے جائیں اور ان پر مؤثر عمل درآمد یقینی بنایا جائے تاکہ آئندہ ایسے حادثات کا تدارک کیا جا سکے۔