کشمیر کے اُڑی میں اچانک گرا پہاڑ، سڑک سے گزر رہے لوگوں کی نکل پڑی چیخ، خوفناک ویڈیو آئی سامنے

جموں و کشمیر کے اُڑی میں اس وقت افرا تفری کا عالم پیدا ہو گیا، جب لینڈسلائیڈ کے سبب پہاڑوں سے چٹانیں سڑک پر گرنے لگیں۔ یہ حادثہ بارہمولہ-اُڑی روڈ پر پیش آیا۔ بارہمولہ میں ایکو پارک کے سامنے والے علاقہ کے پاس لینڈسلائیڈ کے سبب ٹریفک پوری طرح سے روک دیا گیا۔ یہاں سڑک کو چوڑا بنانے کا کام بھی چل رہا ہے۔

میڈیا رپورٹس میں بتایا جا رہا ہے کہ پہاڑ سے اب بھی چٹانیں اور ملبہ گر رہا ہے، جس سے سنگین خطرہ بنا ہوا ہے۔ ایکو پارک علاقہ میں لینڈسلائیڈ کے سبب سری نگر-بارہمولہ قومی شاہراہ بند ہو گیا، جس سے ٹریفک جام کا نظارہ دیکھنے کو مل رہا ہے۔ اس حادثہ میں کسی کے ہلاک ہونے کی خبر نہیں ہے، لیکن مقامی لوگوں میں دہشت کا ماحول ہے۔

اس درمیان شدید برف باری کے سبب کشمیر کو جموں علاقہ سے جوڑنے والی مغل روڈ اور سنتھن ٹاپ روڈ بند ہو گئی ہے۔ افسران نے بتایا کہ جموں-سری نگر قومی شاہراہ گاڑیوں کے لیے کھلا رہا، لیکن خراب موسم کو پیش نظر رکھتے ہوئے مسافروں کو دن کے وقت ہی شاہراہ پر سفر کرنے کا مشورہ دیا گیا ہے۔ ٹریفک پولیس کے مطابق برف باری کے سبب مغل روڈ اور سنتھن روڈ بند ہے۔ لوگوں کو مشورہ دیا جاتا ہے کہ جب تک یہ سڑکیں پوری طرح سے نہ کھل جائیں، تب تک ان پر سفر نہ کریں۔

وادیٔ کشمیر کے شوپیاں اور اننت ناگ ضلعوں کو جموں علاقہ کے پونچھ اور کشتواڑ ضلعوں سے جوڑنے والے دونوں راستہ پیر کی گلی اور سنتھن ٹاپ بیلٹ سمیت دیگر علاقوں میں ہوئی برف باری کے بعد بند کر دیے گئے ہیں۔ برف باری کم ہونے کے بعد ان سڑکوں کو کھول دیا جائے گا اور ٹریفک بہتر انداز میں بحال کر دیا جائے گا۔