پونچھ میں ایل او سی پر بارودی سرنگ کا دھماکہ، ایک فوجی اہلکار ہلاک دوسرا زخمی

جموں: جموں و کشمیر کے ضلع پونچھ میں لائن آف کنٹرول کے کرشنا گھاٹی سیکٹر میں ایک بارودی سرنگ دھماکے میں ایک فوجی اہلکار ہلاک جبکہ دوسرا ایک زخمی ہو گیا ہے۔ سرکاری ذرائع نے بتایا کہ کرشنا گھاٹی سیکٹر کے نانگی ٹیکری علاقے میں گزشتہ رات قریب دس بجے ایک بارودی سرنگ دھماکہ ہوا جس کے نتیجے میں ایک فوجی اہلکار ہلاک جبکہ دوسرا ایک زخمی ہو گیا۔

مہلوک فوجی کی شناخت سپاہی کمل دیو ویدیا ساکن ہماچل پردیش ضلع ہمیر پور جبکہ زخمی کی شناخت سپاہی سورو کمار کے طور پر ہوئی ہے۔ انہوں نے بتایا کہ زخمی فوجی اہلکار کو راجوری میں واقع فوجی ہسپتال میں داخل کرایا گیا ہے۔ اس دوران فوج کی وائٹ نائٹ کارپس نے ایک ٹویٹ میں کہا کہ سپاہی کمل دیو ویدیا کرشنا گھاٹی سیکٹر میں ایک آپریشن کے دوران جاں بحق ہو گیا ہے۔

دریں اثنا دفاعی ترجمان لیفٹیننٹ کرنل دیویندر آنند نے اپنے ایک بیان میں کہا کہ سپاہی کمل دیو ویدیا جمعے کی شب پونچھ کے کرشنا گھاٹی سیکٹر میں آپریشنل ڈیوٹی دے رہا تھا کہ اس دوران وہ اچانک ہونے والے ایک بارودی سرنگ دھماکے میں شدید زخمی ہوگیا۔ انہوں نے بیان میں کہا کہ زخمی سپاہی کو فوری طور نزدیکی طبی مرکز پہنچایا گیا جہاں وہ زخموں کی تاب نہ لا کر دم تور گیا۔

بیان کے مطابق 27 سالہ سپاہی کمل دیو ویدیا کا تعلق ہماچل پردیش کے ضلع ہمیر پور سے تھا۔ متوفی سپاہی کے پسماندگان میں ان کی والدہ شریمتی ونیتا دیوی شامل ہے۔ بیان میں متوفی سپاہی کو ایک بہادر فوجی قرار دیتے ہوئے کہا گیا کہ قوم اس بہادر سپاہی کی قربانی کی ہمیشہ مرہون منت رہے گی۔