مہاراشٹر میں 70 ہزار سرکاری اسامیاں خالی، طلبہ کے احتجاج پر اجے ماکن کا حکومت پر سوال

مہاراشٹر میں ہزاروں طلبہ کی جانب سے 70 ہزار سے زائد خالی سرکاری اسامیوں پر فوری بھرتی اور مسابقتی امتحانات کے انعقاد کا مطالبہ زور پکڑ گیا ہے۔ کانگریس کے سینئر رہنما اجے ماکن نے سوشل میڈیا پلیٹ فارم ایکس پر ایک پوسٹ کے ذریعے ریاستی حکومت پر سوال اٹھاتے ہوئے کہا ہے کہ سرکاری ملازمتوں کی اسامیاں خالی پڑی ہیں، جبکہ طلبہ کا ایک اور سال ضائع ہو رہا ہے۔

اجے ماکن نے اپنی پوسٹ میں کہا کہ 3 اکتوبر کو راہل گاندھی نے پونے میں احتجاج کرنے والے طلبہ کی حمایت کی۔ ان طلبہ کا مطالبہ ہے کہ 70 ہزار سے زیادہ خالی سرکاری عہدوں کو ایک ساتھ پُر کیا جائے۔ ان کے مطابق طلبہ کی کوآرڈینیشن کمیٹی نے اپنے احتجاج کو ’ستیہ گرہ‘ پلیٹ فارم پر بھی درج کرایا ہے، جس کے ذریعے راہل گاندھی نے ملک بھر کی تحریکوں اور عوامی مسائل کو براہ راست ان تک پہنچانے کی اپیل کی ہے۔

ماکن نے کہا کہ یہ صرف یقین دہانیوں کا معاملہ نہیں بلکہ عملی کارروائی کا مطالبہ ہے۔ انہوں نے دعویٰ کیا کہ 70 ہزار خالی اسامیوں کا اعداد و شمار خود مہاراشٹر حکومت کی جانب سے جاری کیا گیا تھا۔

کانگریس رہنما کے مطابق مہاراشٹر حکومت کے ڈائریکٹوریٹ جنرل آف انفارمیشن اینڈ پبلک ریلیشنز کی 9 فروری 2026 کی پریس ریلیز میں وزیر اعلیٰ کی جانب سے 70 ہزار سرکاری اسامیوں پر جلد بھرتی شروع کرنے کا اعلان کیا گیا تھا۔ تاہم اکتوبر تک اس معاملے میں پیش رفت نہ ہونے پر طلبہ سڑکوں پر احتجاج کرنے پر مجبور ہیں۔

اجے ماکن نے مہاراشٹر پبلک سروس کمیشن کے امتحانات کا بھی حوالہ دیا۔ ان کے مطابق اسٹیٹ سروسز مین امتحان 2025 کا حتمی نتیجہ اب تک جاری نہیں کیا گیا ہے۔ دوسری جانب 2026 کا امتحان 3 اکتوبر سے شروع ہونا تھا، لیکن کمیشن نے 28 ستمبر کو جاری ایک پریس نوٹ کے ذریعے اسے ملتوی کر دیا۔ ماکن کا کہنا ہے کہ 3 اکتوبر کی شام تک کمیشن نے امتحان کی نئی تاریخ کا اعلان بھی نہیں کیا تھا۔

اجے ماکن نے کہا کہ ہر ملتوی ہونے والا امتحان کسی گریجویٹ کا وہ ایک سال ہے جو دوبارہ واپس نہیں آ سکتا۔ انہوں نے حکومت اور متعلقہ اداروں سے طلبہ کے مطالبات پر فوری کارروائی کرنے کی ضرورت پر زور دیا۔

ماکن نے اپنی پوسٹ میں مہاراشٹر حکومت کی 9 فروری کی پریس ریلیز، مہاراشٹر پبلک سروس کمیشن کی 28 ستمبر کی پریس ریلیز اور 3 اکتوبر تک کمیشن کی جانب سے جاری اعلانات کو اپنے ذرائع کے طور پر پیش کیا ہے۔ انہوں نے راہل گاندھی کی 3 اکتوبر کی ایکس پوسٹ کا بھی حوالہ دیا۔