’56 انچ کا سینہ، 56 بار بے عزتی‘، ٹرمپ کے ہند-پاک جنگ بندی سے متعلق تازہ بیان کے بعد پی ایم مودی پر کانگریس کا طنز

امریکی صدر ڈونالڈ ٹرمپ نے وہائٹ ہاؤس میں دیوالی تقریب کے دوران جب ہندوستانی وزیر اعظم نریندر مودی سے ہوئی بات چیت کا ذکر کیا، تو ساتھ ہی یہ بھی دہرایا کہ ہندوستان اور پاکستان کے درمیان جنگ بندی کے لیے انھوں نے ’تجارت‘ کی مدد لی تھی۔ کانگریس کا دعویٰ ہے کہ یہ ’56ویں‘ مرتبہ ہے جب ٹرمپ نے ہند-پاک جنگ بندی کا سہرا اپنے سر باندھا ہے۔ اس تعلق سے کانگریس نے پی ایم مودی کے پرانے ’56 انچ کا سینہ‘ والے بیان کو سامنے رکھتے ہوئے کہا ہے ’56 انچ کا سینہ، 56 بار بے عزتی‘۔ ساتھ ہی طنزیہ انداز میں ’ایکس‘ ہینڈل پر کی گئی ایک پوسٹ میں ’اب تک 56‘ کیپشن بھی لگایا ہے۔ اس پوسٹ میں ’56‘ لکھا ہوا ہے اور گرافکس کچھ اس انداز میں تیار کیا گیا ہے جس میں ٹرمپ کے سامنے مودی ہاتھ جوڑے اور سر جھکائے ہوئے ہیں۔

کانگریس نے طنزیہ انداز والی ایک ویڈیو بھی ’ایکس‘ ہینڈل پر شیئر کی ہے، جس میں ایک شخص کہتا دکھائی دے رہا ہے کہ ’’مائی فرینڈ ڈونالڈ نے اب تک 56 بار کہہ دیا کہ تجارت کی دھمکی دے کر میں نے نریندر مودی سے جنگ بندی کروا دی۔‘‘ مزید وضاحت کرتے ہوئے ویڈیو میں کہا گیا ہے کہ ’’56، جتنے انچ کے سینہ کا دعویٰ نریندر مودی کرتے ہیں۔ ابھی ہم نے کہا تھا کہ ٹرمپ 56 بار بھی بول دیں گے، اور نریندر مودی کچھ نہیں بولیں گے۔ 56 بار تو ان کا ’جنگ رُکوا دی پاپا‘ والا پروپیگنڈہ اشتہار بھی نہیں چلا تھا۔ لیکن ٹرمپ نے (جنگ بندی کے بارے میں) کہہ دیا 56 بار۔‘‘

اس ویڈیو میں ہندوستانی وزیر اعظم کی خاموشی پر سوال بھی اٹھایا گیا ہے۔ ویڈیو میں اینکرنگ کرنے والا شخص کہتا ہے ’’آخر ایسی کیا مجبوری ہے؟ امریکہ کے دباؤ میں نریندر مودی اتنا کیوں جھک رہے ہیں؟ ٹرمپ کبھی جنگ بندی کا اعلان کر دیتا ہے، تو کبھی ہندوستان کے روس سے تیل نہ خریدنے کا اعلان۔ وہ بھی یہ کہہ کر کہ نریندر نے مجھے یقین دلایا ہے کہ ایسا ہی ہوگا۔‘‘ پی ایم مودی کو تنقید کا نشانہ بناتے ہوئے یہ بھی کہا گیا ہے کہ ’’نریندر بیٹھے بٹھائے مبارکبادی پیغامات بھیجتے رہتے ہیں، اور ٹرمپ نظر انداز کرتے ہیں۔‘‘

روس سے تیل کی خریداری معاملہ میں ٹرمپ کے دعووں کو مدنظر رکھتے ہوئے کانگریس نے ہندوستان کی خارجہ پالیسی کو بھی نشانہ بنایا گیا ہے۔ ویڈیو میں بتایا گیا ہے کہ ’’ان کی (پی ایم مودی کی) جھپی-پپی والی خارجہ پالیسی کسی کام تو نہیں آ رہی، الٹا ملک کو نقصان برداشت کرنا پڑ رہا ہے۔ یہ کتنا افسوسناک معاملہ ہے کہ ہماری پالیسیاں ہماری حکومت نہیں، بلکہ امریکہ اور ٹرمپ طے کر رہے ہیں۔‘‘ ویڈیو کے آخر میں وزیر اعظم کو مخاطب کرتے ہوئے کہا گیا ہے کہ ’’اب تو شرم کیجیے مودی جی! کچھ تو بولیے۔‘‘