سی بی ایس ای ری-ایویلیویشن پورٹل پر 28 ہزار درخواستیں موصول، 2 منٹ کے اندر پورٹل پر ہوئے 15 لاکھ سائبر حملے

بورڈ آف سینئر سیکنڈری ایجوکیشن (سی بی ایس ای) 12 ویں کے ری ایویلیویشن (دوبارہ جانچ) کے لئے درخواست کا عمل جاری ہے۔ اس سلسلے میں سی بی ایس ای نے تازہ معلومات فراہم کی ہے جس کے مطابق 2 مئی کی رات 10 بجے تک 28 ہزار سے زیادہ طلبا نے ری ایویلیویشن کی لئے درخواست کی ہے اور ساتھ ہی یہ بھی بتایا ہے کہ طلباء کے تاثرات کی بنیاد پر صارف کے تجربے کو بہتر بنانے کے لیے مزید بہتری کی گئی ہے جس میں سیشن کی حد بڑھانا بھی شامل ہے۔ سی بی ایس ای نے مزید کہا کہ ہماری ٹیمیں ایک محفوظ، قابل اعتماد اور طلبا کے لیے آسان پلیٹ فارم یقینی بنانے کے لیے لگا تار نظر رکھ رہی ہیں۔

اس سے پہلے سی بی ایس ای نے بتایا تھا کہ 2 مئی کو دو پہر 3 بجے تک 16 ہزار سے زیادہ طلبا نے سی بی ایس ای ری ایویلیویشن پورٹل کے ذریعہ درخواست جمع کی تھی جبکہ پلیٹ فارم کو کئی سائبر حملے کی کوششوں کا سامنا کرنا پڑا تھا۔ سی بی ایس ای کی جانب سے جاری ایک بیان کے مطابق صرف 2 منٹ کے اندر پورٹل پر تقریباً 1.5 ملین یعنی 15 لاکھ سائبر حملے کئے گئے تھے۔

واضح رہے کہ مرکزی وزیر تعلیم دھرمینرر پردھان نے پہلے اشارہ دیا تھا کہ ری ایویلیویشن کے لیے جو بھی طلبا اہل ہوں گے، ان میں سے 20 فیصد سے زیادہ طلبا کی جانب سے ری ایویلیویشن کے لئے درخواست کرنے کی امید نہیں ہے۔ ان اندازوں کی بنیاد پر طلبا کی تعداد تقریباً 80 ہزار رہنے کی امید ہے لیکن پورٹل کھلنے سے پہلے 9 سے 10 گھنٹوں کے اندر ہی 16 ہزار درخواستیں جمع ہوچکی تھیں اور درخواست جمع کرنے کی مدت میں ابھی بھی کافی وقت باقی ہے۔ اس لئے مانا جارہا ہے کہ درخواستوں کی تعداد وزیر تعلیم کی امید سے کہیں زیادہ ہو سکتی ہیں۔

جن طلبا کو ان کی جانچ شدہ جوابی کاپیوں کی اسکین شدہ کاپیاں موصول ہوچکی ہیں وہ ری ایویلیویشن کے لیے درخواست کر سکتے ہیں۔ ایسا کرنے کے لیے سب سے پہلے پورٹل پر لاگ ان کرنا ہوگا، آدھار کی تصدیق مکمل کرنا ہوگی اور مطلوبہ سروس کا انتخا ب کرنا ہوگا۔ اس کے بعد مضمون کی تفصیلات درج کرنا ہوگی، فیس کی ادائیگی کرنا ہوگی اور پھر درخواست جمع کرنا ہوگی۔ بورڈ نے اس بات پر زور دیا ہے کہ طلبا کو اپنی درخواست جمع کرنے سے پہلے اس کا بغور مطالعہ کر لینا چاہیے کیونکہ بعد میں اس میں کوئی تبدیلی نہیں کی جا سکے گی۔

سی بی ایس ای نے کہا ہے کہ جن طلبا کے پاس آدھار کارڈ نہیں ہے وہ ویریفکیشن کے لیے والدین، سرپرست یا رشتے دار کے آدھار کارڈ کا استعمال کر سکتے ہیں۔ بورڈ نے مزید کہا کہ ویریفکیشن کے دوران درج کیا گیا آدھار سے منسلک نام، تاریخ پیدائش اور جنس اس شخص کی تفصیلات سے مماثل ہونی چاہیے جس کا آدھار نمبر استعمال کیا جا رہا ہے۔