16 دن، 25 اضلاع اور 1300 کلومیٹر کا سفر، بہار میں راہل گاندھی کی ’ووٹر ادھیکار یاترا‘

الیکشن کمیشن کی طرف سے کرائے جا رہے خصوصی گہری نظر ثانی (ایس آئی آر) کے خلاف راہل گاندھی کی’ووٹر ادھیکار یاترا‘ آج سے شروع ہونے جا رہی ہے۔ اس یاترا کی شروعات بہار کے سہسرام سے ہوگی۔ راہل کی یہ یاترا بہار میں 16 دن تک چلے گی۔ اس دوران وہ 1300 کلومیٹر پیدل چلیں گے۔

انڈیا بلاک کے زیر اہتمام منعقد ’ووٹر ادھیکار یاترا‘ 25 ضلعوں کی گردش کے بعد یکم ستمبر کو پٹنہ کے گاندھی میدان میں ایک عطیم ریلی کے ساتھ اپنے اختتام کو پہنچے گی۔ اس یاترا میں کانگریس اور دیگر اپوزیشن پارٹیوں کے رہنماؤں کے ساتھ ساتھ بہار کے سابق نائب وزیر اعلیٰ اور آر جے ڈی لیڈر تیجسوی یادو بھی شامل ہوں گے۔

دہلی میں ایک پریس کانفرنس کے دوران کانگریس ترجمان پون کھیڑا نے یاترا کا خاکہ پیش کرتے ہوئے کہا کہ راہل گاندھی کی ’ووٹر ادھیکار یاترا‘ 1300 کلومیٹر کی ہوگی جو کہ اہم انتخابی حلقوں سے ہوکر گزرے گی اور ان علاقوں میں عوامی حمایت حاصل کرے گی جہاں حق رائے دہی سے محروم ہونے کے الزام سب سے سنگین ہیں۔

کھیڑا نے اعلان کرتے ہوئے کہا کہ یہ صرف ایک یاترا نہیں ہے۔ یہ ایک عوامی تحریک ہے۔ ’ووٹر ادھیکار یاترا‘ جمہوریت کی تاریخ میں ایک سنگ میل ثابت ہوگی۔ انہوں نے آگے کہا کہ یہ یاترا غریبوں، دلتوں، پسماندوں، آدیباسیوں، اقلیتوں اور حاشیے پر پڑے لوگوں کی آواز کو دبانے کی ایک سوچی سمجھی سازش کے خلاف احتجاجی مظاہرہ ہے۔

ایس آئی آر اور ووٹر لسٹ کو لے کر کانگریس مسلسل الیکشن کمیشن کو اپنے گھیرے میں لیے ہوئے ہے۔ کانگریس پارٹی الیکشن کمیشن پر ایس آئی آر کے ذریعہ ووٹر لسٹ میں ہیرا پھیری کرنے کے لیے برسراقتدار بی جے پی کے ساتھ ملی بھگت کا الزام لگا رہی ہے۔ حال ہی میں سپریم کورٹ کی مداخلت کا حوالہ دیتے ہوئے کھیڑا نے کہا کہ عدالتی دباؤ کے بعد ہی الیکشن کمیشن اپوزیشن اور سول سوسائٹی کے ذریعہ اٹھائے گئے بے ضابطیوں پر جانچ کرنے کے لیے متفق ہوا۔