امریکہ سے وطن واپس بھیجے گئے 104 ہندوستانی اب کبھی نہیں جا پائیں گے امریکہ سمیت تقریباً 20 ممالک

ناجائز طریقے سے امریکہ میں مقیم 104 ہندوستانی 5 فروری کو ہندوستان آ چکے ہیں۔ اب ان سبھی کے لیے ایک بڑی مشکل یہ ہے کہ وہ کبھی امریکہ جانا چاہیں تو بھی نہیں جا سکتے ہیں۔ ڈیپورٹ کیے گئے سبھی ہندوستانیوں کے بایومیٹرک اسکین لیے گئے ہیں۔ مستقبل میں وہ دوبارہ امریکہ جانے کے لیے ضروری کاغذات دکھائیں گے، تو بھی انھیں اس کی اجازت نہیں ملے گی۔ غور کرنے والی بات یہ ہے کہ امریکہ سمیت تقریباً 20 ممالک ایسے ہیں جہاں امریکہ سے ڈیپورٹ کیے گئے 104 ہندوستانی کبھی نہیں جا سکیں گے۔

دراصل امریکہ کی ویزا پالیسی پر تقریباً 20 ممالک عمل کرتے ہیں۔ اس کا نتیجہ یہ ہے کہ ہندوستان پہنچے امریکہ میں غیر قانونی طریقے سے رہنے والے اشخاص کناڈا، نیوزی لینڈ، آسٹریلیا، برطانیہ سمیت تقریباً 20 ممالک نہیں جا پائیں گے۔ جن اشخاص کو امریکہ سے نکالا گیا ہے، ان میں گجرات و ہریانہ کے 33-33، پنجاب کے 30، یوپی و مہاراشٹر کے 3-3 اور چنڈی گڑھ کے 2 لوگ شامل ہیں۔

بہرحال، نئی دہلی میں موجود امریکی سفارت خانہ کے ترجمان کا کہنا ہے کہ واشنگٹن امیگریشن قوانین کو سخت کر رہا ہے۔ یہی وجہ ہے کہ غیر قانونی طریقے سے رہنے والے مہاجرین کو نکالا جا رہا ہے۔ جہاں تک امریکہ میں غیر قانونی طریقے سے رہنے والے ہندوستانیوں پر کارروائی کا معاملہ ہے، ہندوستان میں پورے معاملے کی جانچ شروع ہو گئی ہے۔ بتایا جا رہا ہے کہ ان میں سے ایسے ہندوستانیوں پر کوئی کیس نہین کیا جائے گا جو ٹورسٹ ویزا لے کر امریکہ گئے تھے اور کچھ وقت گزرنے کے بعد غیر قانونی طریقے سے وہیں رہنے لگے۔ ایسے ہندوستانی مہاجرین جنھوں نے ہندوستان میں کوئی جرم کیا تھا اور بھاگ کر امریکہ چلے گئے تھے، ان کے خلاف قانونی کارروائی ضرور ہوگی۔