بنگلورو کی دہلی پر شاندار جیت، دہلی میں 'کنگ' کوہلی چمکے

آئی پی ایل 2025 کے 46ویں میچ میں رائل چیلنجرز بنگلور نے دہلی کیپٹلس کو 6 وکٹوں سے شکست دے دی۔ ویراٹ کوہلی اور کرنال  پانڈیا آر سی بی کی جیت کے ہیرو رہے۔ دونوں نے چوتھی وکٹ کے لیے سنچری شراکت داری کی۔ ویراٹ نے 51 اور پانڈیا  نے 73 رنز بنائے۔ اس جیت کے ساتھ ہی آر سی بی پوائنٹس ٹیبل میں پہلی پوزیشن پر پہنچ گئی ہے۔

دہلی کیپٹلس نے پہلے بلے بازی کرتے ہوئے 20 اوور میں 162 رنز بنائے۔ جواب میں، آر سی بی نے ایک مرحلے پر صرف 26 رنز پر 3 وکٹ گنوا دیے تھے، لیکن پھر ویراٹ اور پانڈیا  نے مضبوط بلے بازی سے اپنی ٹیم کی جیت کو یقینی بنایا۔ اس طرح آر سی بی نے دہلی کے ہاتھوں بنگلور کی شکست کا بدلہ بھی لے لیا۔

پانڈیا نے 47 گیندوں پر ناٹ آؤٹ 73 رنز کی میچ وننگ اننگز کھیلی۔ انہوں نے 5 چوکے اور 4 چھکے لگائے۔ پانڈیا نے 9 سال بعد آئی پی ایل میں نصف سنچری بنائی ہے۔ اس سے پہلے 2016 میں ان کے بلے سے ففٹی آئی تھی۔

163 رنز کے ہدف کا تعاقب کرتے ہوئے آر سی بی کی شروعات بہت خراب رہی۔ اپنے ڈیبیو میچ میں اوپننگ کرنے آئے جیکب بیتھل 6 گیندوں میں 12 رنز بنانے کے بعد آؤٹ ہوئے۔ اس کے بعد دیودت پاڈیکل کھاتہ نہیں کھول سکے۔ اس کے بعد رجت پاٹیدار رن آؤٹ ہو گئے۔ انہوں نے 6 رنز بنائے۔ اس طرح آر سی بی نے صرف 26 رن پر 3 وکٹ گنوا دیئے۔

اس کے بعد ویراٹ کوہلی اور  پانڈیا نے 119 رنز کی شراکت قائم کی۔ ویراٹ نے 47 گیندوں میں 4 چوکوں کی مدد سے 51 رنز بنائے۔ اس کے ساتھ ویراٹ نے اورنج کیپ بھی جیت لی ہے۔ آخر میں ٹم ڈیوڈ نے صرف پانچ گیندوں پر 19 رنز بنائے۔ انہوں نے تین چوکے اور ایک چھکا لگایا۔دہلی کے لیے کپتان اکشر پٹیل نے بہترین گیند بازی کی۔ انہوں نے اپنے چار اوورز میں صرف 19 رنز دے کر 2 وکٹیں حاصل کیں۔ اس کے علاوہ دشمنتھا چمیرا نے 3 اوورز میں 24 رنز دے کر ایک وکٹ حاصل کی۔