کے کے آر نے ہدف کا تعاقب 34 گیندیں پہلے ہی کر لیا، دہلی کی عبرتناک شکست

کولکتہ نائٹ رائیڈرز نے دہلی کیپٹلز کو  آٹھ وکٹوں سے شکست دے دی۔ یہ آئی پی ایل 2026 سیزن میں کولکتہ کی لگاتار چوتھی جیت ہے، جس نے پلے آف کی اپنی امیدوں کو زندہ رکھا۔ فن ایلن، جو ایک امپیکٹ کھلاڑی کے طور پر میدان میں آئے، انہوں نے میچ  میں  100 رنز بنا کر تاریخ رقم کی۔ دہلی کیپٹلس نے پہلے بلے بازی کرتے ہوئے 142 رنز بنائے تھے، لیکن جواب میں کولکتہ نے یہ ہدف 34 گیندوں پر پہلے ہی حاصل کر لیا۔

فن ایلن نے چھکا لگا کر کولکتہ نائٹ رائیڈرز کو فتح دلائی۔ انہوں نے اپنی سنچری 47 گیندوں میں مکمل کی جو کہ آئی پی ایل کی تاریخ میں کولکتہ کے لیے تیز ترین سنچری ہے۔ فن ایلن کے کے آر کے لیے سنچری بنانے والے صرف چوتھے بلے باز ہیں۔ ان سے پہلے برینڈن میک کولم، وینکٹیش ایر، اور سنیل نارائن کولکتہ کے لیے سنچریاں بنا چکے ہیں۔

فن ایلن 47 گیندوں پر 100 رنز بنا کر ناٹ آؤٹ رہے، انہوں نے اس دھماکہ خیز اننگز میں 5 چوکے اور 10 چھکے لگائے۔ ایلن نے 80 رنز صرف باؤنڈریز کے ذریعے بنائے۔ ایک موقع پر ایلن 34 گیندوں پر 53 رنز بنا کر بیٹنگ کر رہے تھے۔ انہوں نے اپنی اننگز کے آخری 47 رنز بنانے کے لیے صرف 13 گیندیں لیں۔ دوسری جانب دہلی کیپٹلز  کی جانب سے پتھم نسانکا نے 50 اور آشوتوش شرما نے 39 رنز بنائے۔ لیکن یہ اسکور یقینی طور پر دفاع کے قابل نہیں تھا۔ اکشر پٹیل اور لونگی نگیڈی کے علاوہ دہلی کے تمام گیند بازوں کا کوئی اثر نظر نہیں آیا۔

یہ وہی کولکتہ نائٹ رائیڈرز ہے جس نے سیزن کے پہلے چھ میچوں میں ایک بھی میچ نہیں جیتا تھا۔ لیکن اب کولکتہ نے فتوحات کی ہیٹ ٹرک اسکور کی ہے، جس سے ان کے 10 میچوں میں 9 پوائنٹس ہو گئے ہیں۔ کے کے آر اب بھی کسی پر بھروسہ کیے بغیر آسانی سے پلے آف برتھ محفوظ کر سکتا ہے۔ اگلے چار میچ جیتنے سے وہ 17 پوائنٹس تک پہنچ سکتے ہیں۔