آئی پی ایل 2020: حیدرآباد سے ہار کے بعد کپتان اسٹیو اسمتھ نے بتایا کہاں ہو گئی چوک!

ابو ظہبی: آئی پی ایل 2020 کے 40 ویں میچ میں سن رائزرس حیدرآباد نے راجستھان رائلز کو آٹھ وکٹوں سے شکست دے دی۔ منیش پانڈے اور وجئے شنکر حیدرآباد کی اس فتح کے ہیرو رہے۔ پانڈے نے 47 گیندوں پر ناٹ آؤٹ 83 اور شنکر نے 51 گیندوں پر ناٹ آؤٹ 52 رنز بنائے۔ ان دونوں نے تیسرے وکٹ کے لئے 140 رنز کی ناقابل شکست شراکت بھی کی۔

راجستھان رائلز نے اس میچ میں پہلے کھیلنے کے بعد 20 اوورز میں چھ وکٹوں کے نقصان پر 154 رنز بنائے تھے۔ جواب میں سن رائزرس حیدرآباد نے صرف 16 اوور میں دو وکٹ کے نقصان پر 11 گیندوں پہلے ہی آسانی سے ہدف کا تعاقب کر لیا۔ راجستھان رائلز کے کپتان اسٹیو اسمتھ حیدرآباد کے خلاف اس شکست سے مایوس نظر آئے۔

شکست کے بعد اسمتھ نے کہا، "ہمارا آغاز بہت اچھا تھا۔ جوفرا آرچر نے شروع میں ہی ہمیں دو بڑی وکٹیں دلا دیں، لیکن اس کے بعد ہم ان پر حاوی نہیں ہو سکے۔ منیش پانڈے اور وجئے شنکر کی طرح کی بیٹنگ کی اس سے میچ ہم سے دور ہوتا چلا گیا۔ شروع میں ہی ہمیں آرچر سے تیسرا اوور بھی کرا لینا چاہئے تھا۔ ٹیم کے دوسرے کھلاڑیوں نے بھی مجھ سے اس کے لئے بات کی تھی، لیکن میں نے ایسا نہیں کیا۔ شاید یہاں مجھ سے چوک ہو گئی۔‘‘

خیال رہے کہ اس شکست کے بعد راجستھان رائلز کی پلے آف میں پہنچنے کی امیدیں بھی ختم ہو چکی ہیں۔ پوائنٹ ٹیبل میں وہ اب آٹھ پوائنٹس کے ساتھ ساتویں نمبر پر آ گئی ہے۔ جبکہ اس فتح کے بعد سن رائزرس حیدرآباد کی ٹیم آٹھ پوائنٹس کے ساتھ پوائنٹس ٹیبل میں پانچویں نمبر پر آ گئی ہے۔