امریکی صدر ٹرمپ کینیڈین اشتہار پر برہم، ٹیرف پر مذاکرات ختم کرنے کا اعلان

واشنگٹن: امریکی صدر ڈونلڈ ٹرمپ نے جمعرات کو دیر رات گئے سوشل میڈیا پر اطلاع دی کہ وہ کینیڈا کے ساتھ جاری تمام تجارتی مذاکرات کو ختم کر رہے ہیں، کیونکہ وہاں کے ایک ٹی وی اشتہار میں امریکی محصولات (ٹیرف) پر تنقید کی جا رہی ہے۔ خیال رہے کہ صدر ٹرمپ اپنی دوسری مدت کار کے آغاز سے ہی کئی ممالک سے تجارتی معاہدوں پر مذاکرات کر رہے ہیں۔ تاہم ان کی ٹیرف وار کی پالیسی کے سبب کئی ممالک کے لیے کاروبار کرنا ممکن نہیں رہا ہے۔

ٹرمپ کئی ممالک پر اعلیٰ محصولات عائد کر کے دباؤ بنانے کی حکمت عملی اختیار کر رہے ہیں۔ اس کے سبب کئی ممالک امریکہ کی شرائط پر سمجھوتہ کرنے پر مجبور ہو رہے ہیں۔ دریں اثنا، صدر ٹرمپ نے کینیڈا کے ساتھ جاری تمام مذاکرات کو ختم کرنے کا اعلان کر دیا۔

صدر ٹرمپ نے اپنے فیصلے کی وجہ بیان کرتے ہوئے کہا کہ کینیڈا میں نشر ہو رہا ٹی وی اشتہار امریکہ کی ٹیرف پالیسی کے خلاف ہے۔ انہوں نے ان اسے کو گھناؤنا اور گمراہ کن قرار دیا اور الزام عائد کیا کہ ان کے ذریعے امریکی سپریم کورٹ کے فیصلے پر اثر انداز ہونے کی کوشش کی جا رہی ہے۔

خیال رہے کہ یہ اشتہار کینیڈا کی ریاست اونٹاریو سے جاری کیا گیا ہے، جس میں سابق امریکی صدر رونالڈ ریگن کے پرانے ریڈیو خطاب کی کلپ کا استعمال کیا گیا ہے۔ اس کلپ میں ریگن کو ٹیرف پر تنقید کرتے ہوئے سنا جا سکتا ہے۔ اشتہار کا مقصد یہ ہے کہ امریکی ٹیرف پالیسی سے کینیڈین معیشت بالخصوص آٹوموبائل سیکٹر کو ہو رہے نقصان کو ظاہر کیا جائے۔

اس اشتہار سے ٹرمپ اس قدر ناراض ہوئے کہ انہوں نے اسے امریکہ کے خلاف پروپیگنڈا قرار دیتے ہوئے کینیڈا کے ساتھ جاری تمام مذاکرات کو ختم کرنے کا اعلان کر دیا۔