فلپائن میں جنوری میں ہوئے خودکش بمباروں کی شناخت

انڈونیشیائی پولس کا دعوی ہے کہ رواں سال کی ابتدا میں فلپائن کے دو گرجاگھروں میں ہوئے حملوں میں ملوث دو خودکش بمباروں کوجن کا تعلق انڈونیشا سے ہے شناخت کرلیا گیا ہے۔ان دھماکوں میں 20 افراد ہلاک اور 100 سے زیادہ افراد زخمی ہوگئے تھے۔قومی پولس کے ترجمان بریگیڈیر جنرل دیدی پریستیو نے منگل کو یہ دعوی کیا۔

پولس ترجمان نے بتایا کہ دونوں بمبار جن کے نام رولی ریان زیکے اور الفا ہندیانی ہیں جو میاں بیوی ہیں، جنہیں حملے سے پہلے ترکی سے ملک بدر کیا گیا تھا۔مسٹردیدی نے کہا کہ انڈونیشیائی پولس نے فلپائن میں گرفتار مشتبہ دہشت گردوں سے ان کے بارے میں معلومات حاصل کی تھیں۔

انہوں نے کہا کہ مشتبہ دہشت گردوں نے قبول کیا تھا کہ ان بم دھماکوں کو انجام دینے والے انڈونیشیائی شہری ہیں۔انہوں نے مزید کہا کہ غیرقانونی قرار دیئے گئے جماعۃ الانصارالدولہ (جے اے ڈی) کے دو اراکین کی گرفتاری کے بعد ہی ان دو بمباروں کو شناخت کیا جاسکا،وہ شام میں دہشت گرد گروپ اسلامک اسٹیٹ کے وفادار ہیں اور ان کا تعلق انڈونیشیا کے مشرقی کلیمنن اور مغربی سماترا صوبوں سے ہے۔پولس نے مزید کہا کہ انڈونیشیا ئی جنگجوؤں کا نیٹ ورک جنوبی فلپائن میں ہے۔