امریکہ اور چین میں 'ٹیرف جنگ'! دونوں ملکوں نے کیا ایک دوسرے پر بھاری ٹیرف لگانے کا اعلان

امریکہ اور چین کے درمیان 'ٹیرف جنگ' شروع ہو گئی ہے۔ امریکی صدر ڈونالڈ ٹرمپ نے کینیڈا اور میکسیکو پر 25 فیصد ٹیرف لگانے کا فیصلہ کیا تھا، جو آج سے نافذ ہوگیا۔ اس کے ساتھ ہی چین کو بھی امریکہ نے شدید جھٹکا دیا ہے۔ امریکہ نے سبھی چینی درآمد پر ٹیرف کو 10 فیصد سے بڑھا کر 20 فیصد کرنے کا اعلان کیا ہے۔

امریکہ کے اس اعلان کے بعد چین کہاں خاموش رہنے والا تھا۔ اس نے جوابی کارروائی کرتے ہوئے امریکی زرعی مصنوعات کی درآمد پر 10 سے 15 فیصد کا اضافی ٹیکس لگایا ہے۔ اس سلسلے میں بیجنگ نے کہا ہے کہ وہ امریکہ سے سویابین، پورک اور دیگر اشیاء کی درآمد پر 10 فیصد ٹیرف لگائے گا۔

چین نے اعلان کرتے ہوئے کہا کہ امریکی چکن، گیہوں، مکا اور کپاس کی درآمد پر 15 فیصد ٹیرف لگایا جائے گا۔ چینی وزارت مالیات کے ایک بیان کے مطابق اضافی چارج 10 مارچ سے نافذ ہوں گے۔ دونوں ملکوں کے درمیان شروع ہوئی اس 'ٹیرف جنگ' کے بعد ممکنہ طور پر 'تجارتی جنگ' کی شروعات ہو گئی ہے جو پوری دنیا کے لیے خطرے کی گھنٹی ہے۔

چین کے وزارت کامرس نے ایک الگ بیان میں کہا ہے کہ امریکہ کے یکطرفہ ٹیرف اقدام ورلڈ ٹریڈ آرگنائزیشن کے ضابطوں کی سنگین خلاف ورزی کرتے ہیں اور چین اور امریکہ کے درمیان اقتصادی اور تجارتی تعاون کی بنیاد کو کمزور کرتے ہیں۔ وہیں وزارت کے ذریعہ جاری اس بیان میں صاف کہا گیا ہے کہ چین اپنے جائز حقوق اور مفاد کی مضبوطی سے حفاظت کرے گا۔