بات چیت انتہائی نازک موڑ پر! امریکہ کے ضرورت سے زیادہ مطالبات امن مذاکرات میں بڑی رکاوٹ: ایران

ایران اور امریکہ کے درمیان جاری سفارتی تعطل انتہائی نازک اور سنگین موڑ پر پہنچ گیا ہے۔ تہران نے واشنگٹن پر امن کی کوششوں کو مکمل طور پر سبوتاژ کرنے کا الزام لگایا ہے۔ ایران کے وزیر خارجہ عباس عراقچی نے اقوام متحدہ کے سیکرٹری جنرل انتونیو گوتریس کے ساتھ فون پر براہ راست اور تفصیلی بات چیت کی ہے۔ اس دوران انہوں نے کہا کہ امریکہ کے ضرورت سے زیادہ مطالبات ہی جاری امن مذاکرات اور جنگ بندی معاہدے کی راہ میں سب سے بڑی رکاوٹ بنے ہوئے ہیں۔

غیر ملکی میڈیا آؤٹ لیٹ ’الجزیرہ‘ کی رپورٹ کے مطابق وزیر خارجہ عباس عراقچی نے بات چیت کے دوران امریکہ کے ارادوں پر سخت سوال اٹھائے۔ انہوں نے الزام لگایا کہ امریکہ نے لگاتار اپنے وعدوں کو توڑ کر، متضاد موقف اپنا کر اور فوجی جارحیت کا مظاہرہ کرکے سفارتی کوششوں کو ہٹیشہ کمزور کیا ہے۔ عراقچی نے کہا کہ ان نامساعد حالات اور امریکی دباؤ کے ہتھکنڈوں کے باوجود تہران لگاتار جنگ بندی مذاکرات میں مثبت طور سے مشغول ہے اور مذاکراتی حل کی تلاش میں ہے۔ عراقچی نے یہ بھی کہا کہ ایک طرف فوجی حملوں کی دھمکی اور دوسری طرف امن کا ڈھونگ، امریکہ کے یہ متضاد اور دباؤ کے حربے اب کام نہیں آئیں گے۔ ایران اپنی خودمختاری کی قیمت پر کبھی بھی امریکہ کے سامنے ہتھیار نہیں ڈالے گا۔

دریں اثنا، سیکیورٹی محاذ پر ایک انتہائی سنسنی خیز اور پریشان کن خبر سامنے آرہی ہے۔ امریکی صدر ڈونالڈ ٹرمپ کی انتظامیہ سنجیدگی سے ایران کے خلاف نئے فوجی حملے کی منصوبہ بندی کر رہی ہے۔ امریکی انٹیلی جنس ذرائع کا حوالہ دیتے ہوئے سی بی ایس نیوز نے دعویٰ کیا کہ جمعے کے روز امریکی انتظامیہ ایران پر حملوں کے ایک نئے دور کی تزویراتی تیاریوں میں مصروف تھی۔ تاہم ذرائع کا کہنا ہے کہ ان حملوں کے حوالے سے ابھی تک کوئی حتمی فیصلہ نہیں کیا گیا۔

اس ممکنہ فوجی کارروائی کی خبر ملتے ہی امریکی فوج اور انٹیلی جنس کمیونٹی کے کئی اعلیٰ عہدیداروں نے اپنے ’میموریل ڈے ویک اینڈ‘ کی تعطیلات اور منصوبے منسوخ کر دیے ہیں۔ صدر ٹرمپ نے بھی ہفتے کے آخر میں نیو جرسی میں اپنے گولف ریزورٹ میں گزارنے اور اپنے بیٹے جونیئر ٹرمپ کی شادی میں شامل ہونے لا پروگرام منسوخ کر دیا ہے۔ ٹرمپ نے سوشل میڈیا پلیٹ فارم ’ٹروتھ سوشل‘ پر ایک پوسٹ میں اس بات کی تصدیق کرتے ہوئے کہا کہ قومی مفاد اور نازک حکومتی صورتحال کے پیش نظر ان کا اس وقت وائٹ ہاؤس میں موجود ہونا بالکل ضروری ہے۔

دوسری طرف اقوام متحدہ کے ذرائع کے مطابق سیکرٹری جنرل انتونیو گوترس نے اس پورے حالات پر گہری تشویش کا اظہار کیا ہے۔ گوٹریس نے کسی بھی ملک کی خودمختاری کے خلاف طاقت کے استعمال یا فوجی کارروائی کے خیال کو واضح طور پر مسترد کر دیا۔ انہوں نے دونوں فریقوں کو مغربی ایشیا کے خطے میں استحکام اور امن کی بحالی کے لیے دونوں ہی فریقوں سے صرف اور صرف سفارت کاری کا راستہ اختیار کرنے کی پرزور وکالت کی۔