فیسبک پر لوٹنے میں اب کوئی دلچسپی نہیں: ٹرمپ

واشنگٹن: امریکہ کے سابق صدر ڈونالڈ ٹرمپ نے کہا ہے کہ اگر فیسبک کے سی ای او مارک زکربرگ انھیں سوشل میڈیا پلیٹ فارم پر لوٹنے کی اجازت دیں گے بھی تو انھیں واقعی اس بابت کوئی دلچسپی نہیں ہوگی۔ ڈونالڈ ٹرمپ نے ہفتے کے روز نارتھ کیرولینا میں ریپبلیکن پارٹی کے اجلاس میں کہا،’ہم اپنے ملک کو اس طرح کے انسانی برتاؤ سے نہیں چلنے دے سکتے۔ وہ کہتے ہیں کہ وہ مجھے دو برسوں میں واپس آنے (فیسبک پر) کی اجازت دے سکتے ہیں۔ مجھے اس میں کوئی دلچسپی نہیں ہے‘۔

ڈونالڈ ٹرمپ نے اس وقت کو یاد کیا جب وہ صدر تھے اور مارک زکربرگ اپنی بیوی کے ساتھ وائٹ ہاؤس آئے تھے۔ انہوں نے کہا کہ اس وقت مارک زکربرگ نے میرے بارے میں فیسبک پر نمبر ون پر رہنے کے حوالے سے بات کی تھی۔ سابق صدر نے کہا کہ جس دن سے وہ صدر کے عہدے سے ہٹے اسی دن سے مارک زکربرگ کا رویہ ان کے تئیں بدل گیا۔ اس سے پہلے جمعہ کے روز ڈونالڈ ٹرمپ نے کہا کہ فیسبک کا ان پر دو برسوں کے لیے پابندی لگانا انھیں ووٹ دینے والے سات کروڑ 50 لاکھ امریکیوں کی بے عزتی تھی۔

فیسبک نے جمعہ کے روز ہی اعلان کیا تھا کہ ڈونالڈ ٹرمپ کے اکاؤنٹ کو دو سال کے لیے معطل رکھنے کا فیصلہ برقرار ہے۔ فیسبک نے کہا کہ اس کے کمیونٹی اسٹینڈرڈ کی خلاف ورزی کے سبب ڈونالڈ ٹرمپ کے اکاؤنٹ پر پابندی عائد کی گئی تھی۔ غورطلب ہے کہ جنوری میں ڈونالڈ ٹرمپ کے فیسبک اور انسٹاگرام اکاؤنٹ پر پابندی عائد کر دی گئی تھی۔