امریکہ میں ہندوستانی نژاد خاتون کاقتل، پولیس کا چونکانے والا انکشاف، ملزم سابق عاشق بھاگ گیا ہندوستان!

امریکہ میں نئے سال سے عین قبل لاپتہ ہوئی 27 سال کی ایک ہندوستانی نژاد خاتون کےقتل کاسنسنی خیز واقعہ سامنے آیا ہے۔ میری لینڈ کے ایلی کوٹ سٹی میں رہنے والی نکیتا گودیشا اپنے سابق عاشق کے اپارٹمنٹ میں مردہ پائی گئی۔ نکیتا کے جسم پر کئی بار چاقو سے وار کیے گئے تھے۔ دعویٰ کیا جا رہا ہے کہ نکیتا کے سابق عاشق نے ہی اس کاقتل کیا ہے۔وہ پیشے سے ڈاٹا اورحکمت عملی کا تجزیہ کار ہے۔

اے بی پی پر نشر سی بی ایس نیوز کی رپورٹ کے مطابق پولیس نے بتایا کہ نکیتا کو آخری بار نئے سال سے پہلے دیکھا گیا تھا۔ اس کے بعد وہ اپنے سابق بوائے فرینڈ ارجن شرما کے اپارٹمنٹ میں مردہ پائی گئی۔ نکیتا کےجسم پر چاقو سے کئی بار وار کیے گئے تھے۔ پولیس افسران کا خیال ہے کہ نکیتا کو اس کے سابق بوائے فرینڈ نے ہی قتل کیا ہے، جو بعد میں ہندوستان فرار ہو گیا۔ پولیس نے ملزم کے وارنٹ گرفتاری جاری کر دیے ہیں۔

اطلاعات کے مطابق ارجن شرما نے 2 جنوری کو پولیس کو اطلاع دی کہ نکیتا لاپتہ ہے۔ اس کے بعد اس نے گمشدگی کی رپورٹ درج کرائی۔ اس نے پولیس کو بتایا کہ نکیتا آخری بار 31 دسمبر کو میری لینڈ میں اس کے اپارٹمنٹ میں دیکھا تھا۔ اس کے بعد پولیس نے 3 جنوری کو ارجن شرما کے اپارٹمنٹ کی تلاشی لی اور نکیتا کی لاش ملی، اس کے جسم پر کئی زخم تھے۔

پولیس نے دعویٰ کیا ہے کہ ارجن شرما قتل کے بعد ہندوستان فرار ہو گیا۔ وہ جب پولیس کے پاس شکایت کرنے پہنچا تھا، اسی دن اس نے امریکہ چھوڑنے کا پلان بنا لیا تھا۔ پولیس کا کہنا ہے کہ نکیتا کا قتل 31 دسمبر کو شام تقریباً 7 بجے کیا گیا تھا۔ قتل کی وجہ تاحال معلوم نہیں ہوسکی ہے اور تفتیش جاری ہے۔ اس سلسلے میں ہندوستانی سفارت خانے نے کہا ہے کہ وہ نکیتا کے اہل خانہ سے رابطے میں ہے اور انہیں ہر ممکن مدد فراہم کی جائے گی۔