لبنان پر اسرائیلی فضائی حملے، وزیر اعظم کی امن کے لیے عالمی اپیل

اسرائیل لگاتار فضائی حملے کرکے لبنان کو تباہ و برباد کر دینے کے لیے آمادہ ہے۔ اب اس نے یہاں کے اہم مقامات کو بھی نشانہ بنانا شروع کر دیا ہے۔ گزشتہ روز اسرائیل نے بیروت کے جس گھنی آبادی والے رہائشی علاقے پر حملے کیے وہاں پاس میں ہی اقوام متحدہ کا دفتر، پارلیمنٹ ہاؤس، وزیر اعظم دفتر اور کئی سفارت خانے ہیں۔ لبنان کی سرکاری خبر ایجنسی نے کہا کہ بیروت کے ذوق البلاط علاقے میں دو میزائلیں گری ہیں۔

یہ حملہ ایسے وقت میں ہوا ہے جب خبر آئی ہے کہ امریکی سفیر نے جنگ بندی مذاکرات کے لیے اپنا دورہ ملتوی کر دیا ہے۔ حملوں کے بعد پورے علاقے میں ایمبولنس کے سائرن گونج رہے تھے لیکن جانی نقصان کی کوئی بھی سرکاری تعداد جاری نہیں کی گئی ہے۔ جائے حادثہ پر موجود ایک رپورٹر نے بتایا کہ سڑک پر کافی تعداد میں لوگوں کی جانیں تلف ہوئی ہیں۔ اسرائیلی فوج نے اس حملے کے سلسلے میں پہلے سے کوئی وارننگ جاری نہیں کی تھی۔

لبنان کے کارگزار وزیر اعظم نجیب مقاتی نے اسرائیل کے وحشیانہ حملوں کے بعد سوشل میڈیا سائٹ 'ایکس' پر ایک پوسٹ کیا۔ اس میں انہوں نے کہا کہ سبھی ملکوں اور فیصلہ کرنے والوں سے یہ امید ہے کہ وہ لبنان پر خونی اور تباہ کن اسرائیلی حملوں کو روکیں اور بین الاقوامی قرار دادوں، خاص طور سے قرار داد 1701 کو نافذ کریں۔ اقوام متحدہ کی سلامتی کونسل کی قرار داد 1701 کو 2006 میں اپنایا گیا تھا جس کا مقصد جنوبی لبنان میں ایک بفر زون بنانا تھا اور اسرائیل اور حزب اللہ کے درمیان دشمنی کو ختم کرنا تھا۔

قابل ذکر ہے کہ اتوار کو بھی اسرائیل کے ذریعہ راس النبا علاقے میں حملے کیے گئے تھے۔ اس حملے میں حزب اللہ کے میڈیا ترجمان محمد عفیف کے ساتھ ایک خاتون سمیت 6 لوگوں کی موت ہو گئی تھی۔