ایران کا دعویٰ، امریکہ کے ساتھ کئی معاملات پر اتفاق، معاہدے کو حتمی شکل دینے میں جلدبازی نہیں

تہران: ایران کی وزارت خارجہ کے ترجمان اسماعیل بقائی نے کہا ہے کہ امریکہ کے ساتھ جاری بات چیت میں کئی اہم معاملات پر پیش رفت ہوئی ہے، تاہم کسی معاہدے کو حتمی شکل دینے کے لیے کوئی مقررہ وقت طے نہیں کیا گیا۔ ان کا کہنا تھا کہ تہران کسی جلدبازی میں نہیں ہے اور ایران کے قومی مفادات ہر صورت میں اولین ترجیح رہیں گے۔

ایران کی نیم سرکاری خبر رساں ایجنسی تسنیم کے مطابق، پیر کو ایک پریس کانفرنس کے دوران اسماعیل بقائی نے کہا کہ اس وقت یہ دعویٰ نہیں کیا جا سکتا کہ معاہدے پر دستخط ہونے والے ہیں۔ انہوں نے کہا کہ امریکہ کے اندر سیاسی رویوں میں یکسانیت کا فقدان ہے، جس کی وجہ سے مذاکراتی عمل متاثر ہوتا ہے۔

اسماعیل بقائی نے کہا کہ چند گھنٹوں کے اندر امریکی مؤقف میں تبدیلی کسی بھی سفارتی عمل کو پیچیدہ بنا دیتی ہے۔ ان کے مطابق واشنگٹن میں فیصلے لینے کا نظام غیر منظم نظر آتا ہے، جبکہ استعفوں، کانگریس کے اختلافات، عوامی رائے اور اندرونی سیاسی پیچیدگیوں کا بھی مذاکراتی عمل پر اثر پڑتا ہے۔

انہوں نے یہ بھی کہا کہ بعض بیرونی عناصر بھی صورت حال کو متاثر کرنے کی کوشش کرتے ہیں، جن میں اسرائیلی حکومت سے وابستہ حلقے بھی شامل ہیں۔ ان کا کہنا تھا کہ ایران اپنے حقوق کے تحفظ کے ساتھ ایسے نتائج چاہتا ہے جو قومی مفادات سے مطابقت رکھتے ہوں۔

مذاکرات کے وقت سے متعلق خبروں پر بات کرتے ہوئے اسماعیل بقائی نے واضح کیا کہ معاہدے کو حتمی شکل دینے کے لیے کوئی مخصوص آخری تاریخ طے نہیں کی گئی۔ انہوں نے کہا کہ ایران کسی بھی نتیجے کا اعلان اسی وقت کرے گا جب قومی مفادات کے مطابق مقاصد حاصل ہو جائیں گے۔

انہوں نے بتایا کہ ساٹھ روزہ فریم ورک کے تحت ہونے والی بات چیت میں بعض قانونی دستاویزات اور متعلقہ معاملات کی تفصیلات پر غور کیا جانا ہے۔ ان کے مطابق ان مذاکرات میں جوہری معاملات ایک اہم موضوع رہیں گے۔ تسنیم کی رپورٹ کے مطابق ایران اس مرحلے پر جوہری تفصیلات پر بات نہیں کر رہا، جبکہ چودہ نکاتی یادداشت کا بنیادی مقصد جنگ کے خاتمے سے متعلق معاملات پر توجہ مرکوز رکھنا ہے۔

دوسری جانب اتوار کو امریکی وزیر خارجہ مارکو روبیو نے کہا تھا کہ امریکہ اور ایران کے درمیان سفارتی کوششوں میں نمایاں پیش رفت ہوئی ہے۔ انہوں نے عندیہ دیا تھا کہ آبنائے ہرمز سے متعلق صورت حال پر جلد مثبت پیش رفت سامنے آ سکتی ہے۔

نئی دہلی میں وزیر خارجہ ڈاکٹر ایس جے شنکر کے ساتھ مشترکہ پریس کانفرنس میں مارکو روبیو نے کہا تھا کہ ایک ایسا عمل جاری ہے جو مستقبل میں ایسی صورت حال پیدا کر سکتا ہے جہاں ایران کے جوہری ہتھیاروں سے متعلق خدشات کم ہو جائیں۔