امریکی صدر ڈونلڈ ٹرمپ کے اضافی ٹیرف کو کینیڈا کے وزیر اعظم جسٹن ٹروڈو نے ’احمقانہ قدم‘ قرار دیا

کینیڈا میں جسٹن ٹروڈو کی بطور وزیر اعظم مدت کار میں اب صرف چند دن رہ گئے ہیں۔ اپنی ذمہ داریوں سے سبکدوش ہونے کے عین قبل انہوں نے منگل (4 مارچ) کو ایک پریس کانفرنس کر امریکی صدر ڈونلڈ ٹرمپ کے ذریعہ لگائے گئے ٹیرف پر بڑا بیان دیا۔ ٹروڈو نے امریکی ٹیرف کو احمقانہ قرار دیتے ہوئے کہا کہ صدر ٹرمپ کینیڈا کے ساتھ تجارتی جنگ (ٹریڈ وار) شروع کر کے روس کو خوش کر رہے ہیں۔ ساتھ ہی انھوں نے یہ بھی کہا کہ ’’صدر ٹرمپ نے کینیڈا پر 25 فیصد کا اضافی ٹیرف عائد کیا ہے۔ اس کے جواب میں کینیڈا 100 بلین امریکی ڈالر کے سامان پر جوابی ٹیرف لگائے گا۔‘‘

کینیڈا کے وزیر اعظم جسٹن ٹروڈو نے امریکی ٹیرف کے سلسلے میں غصے کا اظہار کرتے ہوئے کہا کہ ’’آج امریکہ نے اپنے سب سے قریبی ساتھی، اتحادی اور دوست کینیڈا کے خلاف ٹریڈ وار شروع کر دیا ہے۔ وہیں، دوسری جانب روس کے ساتھ مثبت انداز میں کام کرنے کی بات کہتے ہیں، جہاں کا صدر ولادیمیر پوتن ایک جھوٹا اور قاتل تاناشاہ ہے، اور وہ اسے خوش کرنا چاہتے ہیں۔ کیا یہ سمجھداری کی بات ہے۔‘‘

علاوہ ازیں جسٹن ٹروڈو نے کہا کہ ’’ٹرمپ کینیڈا کی معیشت کو مکمل طور سے تباہ کرنا چاہتے ہیں، کیونکہ اس طرہ وہ کینیڈا کو امریکہ میں آسانی سے ملا سکتے ہیں۔ لیکن ایسا کبھی نہیں ہونے والا ہے۔ ہم کبھی امریکہ کی 51 ویں ریاست نہیں بنیں گے۔‘‘ ساتھ ہی ٹروڈو نے ٹرمپ کا نام لیتے ہوئے کہا کہ ’’میں خاص طور پر اس امریکی شخص، ڈونلڈ سے بات کرنا چاہتا ہوں۔ وال اسٹریٹ جرنل کی ہر بات پر متفق ہونا میری عادت نہیں ہے، لیکن ڈونلڈ بھلے ہی تم بہت عقلمند ہو، لیکن یہ قدم نہایت ہی احمقانہ ہے۔‘‘

واضح ہو کہ امریکی صدر ڈونلڈ ٹرمپ نے واشنگٹن کے 3 سب سے بڑے تجارتی شراکت داروں پر اضافی ٹیکس لگانے کا اعلان کیا ہے۔ جس کا نتیجہ یہ نکلا کہ میکسیکو، کینیڈا اور چین نے فوری کارروائی کرتے ہوئے امریکہ پر جوابی ٹیرف لگانے کا اعلان کر دیا ہے، جس سے مالیاتی بازاروں میں کھلبلی مچی ہوئی ہے۔ قابل ذکر ہے کہ ڈونلڈ ٹرمپ نے نصف شب کے بعد میکسیکو اور کینیڈا سے درآمد کی جانے والی اشیاء پر 25 فیصد اضافی ٹیرف لگایا ہے۔ حالانکہ انہوں نے کینیڈین توانائی پر اس ٹیرف کو 10 فیصد ہی رکھا ہے۔