تقریب میں فائرنگ کے بعد ٹرمپ نے کہا ’30 دن بعد پھر ہوگا پروگرام‘ ، سیکرٹ سروس کو دی شاباشی

امریکہ میں وائٹ ہاؤس کے نامہ نگاروں کے ساتھ سالانہ عشائیے میں فائرنگ کی واردات سے امریکہ میں سنسنی پھیل گئی ہے۔ اس دوران صدر ڈونالڈ ٹرمپ نے آناً فاناً پریس کانفرنس کرکے لوگوں سے خطاب کیا اور کہا کہ وہ مکمل طور پر محفوظ ہیں۔ انہوں نے کہا کہ سیکرٹ سروس نے بہت اچھا کام کیا۔ ٹرمپ نے کہا کہ اس گولی باری میں ایک سیکیورٹی اہلکار زخمی ہوا ہے اور بلٹ پروف جیکٹ نے اس کی جان بچالی۔ سیکرٹ سروس نے بہادری کا مظاہرہ کرتے ہوئے ایک حملہ آورکو فوری طور پر دبوچ لیا ہے۔

صدر ٹرمپ نے کہا کہ اس طرح کی بزدلانہ وارداتیں انہیں ان کے مشن سے پیچھے نہیں ہٹاسکتیں۔ انہوں نے خاص طور پر ایران کا ذکر کرتے ہوئے کہا کہ یہ واردات مجھے ایران کے خلاف جاری لڑائی میں جیت حاصل کرنے سے نہیں روک پائے گی۔ پریس کانفرنس کے دوران ٹرمپ نے واشنگٹن ہلٹن ہوٹل کی سیکورٹی پر بھپی سوال اٹھاتے ہوئے کہا کہ وہ عمارت پوری طرح محفوظ نہیں تھی۔ انہوں نے مستقبل کے لیے وائٹ ہاؤس میں ایک جدید ’وارروم‘ بنانے کی ضرورت پر زوردیا جو ’ڈرون-پروف‘ اور ’بلٹ پروف‘ شیشوں سے لیس ہو۔ جب ان سے پوچھا گیا کہ کیا وہ انڈور پروگراموں کو بند کریں گے، تو صدر ٹرمپ نے دوٹوک کہا کہ ’’میں ایسا نہیں کرسکتا، ہمیں لوگوں کے درمیان جانا ہی ہوگا‘۔

ٹرمپ نے کہا کہ جس طرح سے سیکرٹ سروس نے مجھے، میلانیا اور وینس سمیت دیگر لوگوں کو تیزی سے باہر نکالا، وہ قابل تعریف ہے۔ جس حملہ آور کو پکڑا گیا ہے وہ کیلیفورنیا کا ہے اور بیمار ہے، میری کابینہ کے تمام ساتھی محفوظ ہیں۔ ٹرمپ نے کہا کہ فائرنگ میں ایک افسر کو گولی لگی لیکن وہ بچ گیا کیونکہ اس نے بہت اچھی بلٹ پروف جیکٹ پہن رکھی تھی۔ اسے بہت ہی قریب سے ایک بہت طاقتور گن سے گولی ماری گئی اور جیکٹ نے کام کردیا۔ میں نے ابھی افسر سے بات کی اور حالت دریافت کی ہے وہ ٹھیک ہے۔ انہوں نے کہا کہ یہ بولنے کی آزادی کے لیے ڈیڈیکیٹیڈ ایک ایونٹ تھا جس کا مقصد دونوں پارٹیوں (پریس اور انتظامیہ ) کے ممبران کو ایک ساتھ لانا تھا۔

قبل ازیں ٹرمپ نے سوشل میڈیا پر پوسٹ کیا تھا کہ سیکیورٹی اداروں کی درخواست پر پروٹوکول کی تعمیل کرتے ہوئے جائے وقوعہ کو فوری طور پر خالی کرا دیا گیا ہے۔ ٹرمپ نے کہا کہ وہ خود، خاتون اول میلانیا ٹرمپ، نائب صدر اور کابینہ کے تمام اراکین پوری طرح سے محفوظ اور ’پرفیکٹ کنڈیشن‘ میں ہیں۔