ایران کے حملوں میں کویت کے 67 فوجی زخمی، سینکڑوں میزائل اور ڈرون راستے میں تباہ

کویت: مشرق وسطیٰ میں ایران کے ساتھ جاری کشیدگی کے درمیان کویت کی مسلح افواج کے 67 اہلکار زخمی ہو گئے ہیں۔ کویت کے سرکاری کمیونیکیشن مرکز کی جانب سے جاری بریفنگ میں جمعہ کے روز وزارتِ دفاع نے اس کی تصدیق کی۔

وزارتِ دفاع کے سرکاری ترجمان سعود الاتوان نے بتایا کہ زخمی اہلکاروں کا مختلف اسپتالوں میں علاج جاری ہے اور بیشتر کی حالت مستحکم ہے۔ انہوں نے مزید کہا کہ دو اہلکار ابھی بھی طبی نگرانی میں رکھے گئے ہیں تاکہ ان کی حالت پر مسلسل نظر رکھی جا سکے۔

خبر رساں ایجنسی سنہوا کے مطابق ترجمان نے کہا کہ کویتی مسلح افواج مکمل طور پر چوکس ہیں اور ملک کی سلامتی کے لیے چوبیسوں گھنٹے حالات پر نظر رکھی جا رہی ہے۔ انہوں نے کہا کہ فوج اور سکیورٹی ادارے دیگر سرکاری اداروں کے ساتھ قریبی تعاون میں کسی بھی ممکنہ خطرے سے نمٹنے کے لیے تیار ہیں۔

سعود الاتوان کے مطابق یہ تمام اقدامات ایک وسیع قومی نظام کا حصہ ہیں جس کا مقصد ملک کی خودمختاری اور سلامتی کا تحفظ کرنا اور شہریوں اور یہاں مقیم افراد کے جان و مال کی حفاظت کو یقینی بنانا ہے۔ انہوں نے کہا کہ حالیہ دنوں میں کویت کے دفاعی نظام نے بڑی تعداد میں میزائلوں اور ڈرون حملوں کا بروقت پتہ لگا کر انہیں ناکام بنایا۔

فوجی ترجمان کے مطابق کویت کے فضائی دفاعی نظام نے گزشتہ چند دنوں کے دوران ملک کے فضائی حدود کو نشانہ بنا کر داغے گئے 212 بیلسٹک میزائلوں اور 394 ڈرون کا سراغ لگایا اور انہیں ہدف تک پہنچنے سے پہلے ہی تباہ کر دیا۔

ایرانی حکام کے مطابق ہفتے کے روز اسرائیل اور امریکہ نے مشترکہ کارروائی کرتے ہوئے تہران اور ایران کے دیگر شہروں پر حملے کیے تھے۔ ان حملوں میں ایران کے سپریم لیڈر علی خامنہ ای، ان کے خاندان کے افراد، کئی اعلیٰ فوجی کمانڈر اور عام شہری مارے گئے۔ ایران نے اس کے جواب میں مشرق وسطیٰ میں اسرائیل اور امریکہ سے وابستہ تنصیبات کو نشانہ بناتے ہوئے میزائل اور ڈرون حملے شروع کیے۔

اس سے قبل دو مارچ کو قطر نے بھی ایران کے دو سوخوئی۔24 جنگی طیارے مار گرانے کا دعویٰ کیا تھا جبکہ متعدد میزائلوں اور ڈرون کو بھی فضائی دفاعی نظام کے ذریعے تباہ کر دیا گیا تھا۔ قطر کی وزارتِ دفاع کے مطابق یہ ایک منظم حملہ تھا جسے بروقت کارروائی کے ذریعے ناکام بنایا گیا۔

قطر کے حکام کا کہنا ہے کہ ملک کی فضائیہ، بحریہ اور فضائی دفاعی نظام مکمل طور پر مستعد ہیں اور کسی بھی بیرونی خطرے کا مؤثر جواب دینے کی صلاحیت رکھتے ہیں۔ اسی دوران متحدہ عرب امارات، قطر، سعودی عرب، بحرین، اردن، کویت اور امریکہ نے ایک مشترکہ بیان میں خطے کے مختلف ممالک کو نشانہ بنانے والے حملوں کی سخت مذمت بھی کی ہے۔