فیفا عالمی کپ کے درمیان فلسطینی فٹبالر کا گولی مار کر قتل، 5 ماہ قبل ہوئی تھی سلیم قادر کی شادی

ایک طرف ’فیفا ورلڈ کپ 2026‘ کا بخار فٹ بال شائقین پر زور و شور سے حاوی ہے، اور دوسری طرف ایک فٹ بالر کا قتل کیے جانے کی خبر نے غم و اندوہ کا ماحول پیدا کر دیا ہے۔ موصولہ اطلاع کے مطابق 32 سالہ فلسطینی فٹبالر سلیم قادر الاشقر کو گولی مار کر ہلاک کر دیا گیا ہے۔ ان کی موت اسرائیلی دفاعی افواج (آئی ڈی ایف) کی فائرنگ سے ہوئی۔ ان کی شادی صرف 5 ماہ قبل ہوئی تھی اور ان کی اہلیہ حاملہ تھیں۔

فلسطین فٹبال ایسوسی ایشن (پی ایف اے) نے سلیم قادر الاشقر کی ہلاکت کی تصدیق کی ہے۔ وہ خان یونس سروسز کلب کے گول کیپر تھے۔ سلیم قادر کی موت سے متعلق خبر سامنے آتے ہی لوگوں نے گہرے رنج و غم کا اظہار کیا۔ پی ایف اے کے مطابق سلیم الاشقر اپنی 7 بہنوں کے واحد بھائی تھے۔ ان کی موت سے نہ صرف ان کی اہلیہ بلکہ ان کی بہنیں بھی شدید صدمہ میں ہیں۔ وہ اپنے پہلے بچے کی شکل دیکھنے سے پہلے ہی دنیا سے رخصت ہو گئے۔

قابل ذکر ہے کہ فلسطین میں جاری تنازعہ کے اثرات ملک کے کھیلوں کے شعبہ پر بھی واضح طور پر نظر آ رہے ہیں۔ اعداد و شمار کے مطابق اب تک فلسطین میں 1009 کھلاڑی اور دیگر اسپورٹس سے وابستہ افراد اپنی جانیں گنوا چکے ہیں۔ ان میں 567 فٹ بال سے وابستہ کھلاڑی، کوچ اور ریفری شامل تھے۔ یہ اعداد و شمار ظاہر کرتے ہیں کہ جاری تنازعہ نے فلسطین کے کھیلوں کو کس قدر متاثر کیا ہے۔

واضح رہے کہ فلسطین کی قومی ٹیم اس وقت جاری ’فیفا عالمی کپ 2026‘ کے لیے کوالیفائی نہیں کر سکی۔ ایشیائی کوالیفائر میں جگہ نہ بنا پانے کے باعث ٹیم ٹورنامنٹ کا حصہ نہیں بن سکی۔ اس بار کے فٹبال عالمی کپ میں 48 ٹیمیں شریک ہیں اور مجموعی طور پر 104 میچ کھیلے جائیں گے۔ یہ پہلا موقع ہے جب کسی فٹبال عالمی کپ میں 32 سے زیادہ ٹیمیں میدان میں اتری ہیں۔ ٹورنامنٹ کی میزبانی 3 ممالک میکسیکو، امریکہ اور کناڈا مشترکہ طور پر کر رہے ہیں۔ یہ بھی پہلی بار ہے جب فیفا عالمی کپ 3 ممالک کی مشترکہ میزبانی میں منعقد ہو رہا ہے۔ اس سے قبل 2022 کا فیفا عالمی کپ قطر میں کھیلا گیا تھا۔