فیفا عالمی کپ 2026: سبقت کے باوجود چیکیا کو ملی شکست، جنوبی کوریا نے 1-2 سے ہرایا

جنوبی کوریا نے ایک گول سے پیچھے ہونے کے باوجود شاندار واپسی کرتے ہوئے چیکیا (چیک ریپبلک) کو 1-2 سے شکست دے کر ’فیفا عالمی کپ 2026‘ میں فاتحانہ آغاز کیا ہے۔ جنوبی کوریا اور چیکیا کے درمیان یہ مقابلہ انتہائی سنسنی خیز رہا۔ میچ کے پہلے ہاف تک دونوں ٹیمیں کوئی گول نہ کر سکیں، لیکن دوسرے ہاف میں مجموعی طور پر 3 گول ہوئے اور جنوبی کوریا کامیابی حاصل کرنے میں کامیاب رہا۔

اس مقابلہ میں چیکیا نے 59ویں منٹ میں گول کر کے اسکورنگ کا آغاز کیا اور جنوبی کوریا کے خلاف 0-1 کی سبقت حاصل کر لی۔ چیکیا کے لیے پہلا گول لادیسلاو کریجچی نے کیا۔ تاہم جنوبی کوریا نے ہمت نہیں ہاری اور ہوانگ ان بیوم نے 67ویں منٹ میں گول کر کے اپنی ٹیم کو برابری دلائی۔ اس کے بعد اوہ ہیون گیو نے جنوبی کوریا کے لیے دوسرا گول کیا اور ٹیم کو 1-2 کی برتری دلا دی۔ چیکیا کی ٹیم اختتام تک اس خسارے کو پورا نہ کر سکی اور اسے شکست کا سامنا کرنا پڑا۔

چیکیا اور جنوبی کوریا کے درمیان میچ ابتدا ہی سے دلچسپ رہا۔ نویں منٹ میں جنوبی کوریا کو فری کک ملی اور اس کے پاس برتری حاصل کرنے کا بہترین موقع تھا، لیکن چیکیا کے دفاع نے مضبوطی سے مقابلہ کیا اور گول نہ ہونے دیا۔ اس کے بعد 11ویں منٹ میں جنوبی کوریا کو کارنر ملا، لیکن چیکیا نے ایک بار پھر گول روک دیا۔ جنوبی کوریا نے مسلسل دباؤ بڑھایا، لیکن لی ہان بیوم گول کیپر کو شکست دینے میں ناکام رہے۔

پہلے ہاف کے 21ویں منٹ میں چیکیا کو گول کرنے کا بہترین موقع ملا۔ اس کے سامنے جنوبی کوریا کے دفاع کو توڑنے کا چیلنج تھا، لیکن یہ کام آسان ثابت نہ ہوا اور وہ موقع ضائع ہو گیا۔ اس کے ایک منٹ بعد بھی چیکیا کو ایک اور موقع ملا، لیکن ٹیم برتری حاصل کرنے میں ناکام رہی۔ اس کے بعد پہلے ہاف میں دونوں ٹیموں کو کئی مواقع ملے، لیکن کبھی چیکیا اور کبھی جنوبی کوریا کے دفاعی کھلاڑیوں نے پھرتی کا مظاہرہ کرتے ہوئے حریف کو برتری حاصل کرنے سے روک دیا۔ یوں پہلے ہاف کا اختتام بغیر کسی گول کے برابری پر ہوا۔

پہلا ہاف گول کے بغیر ختم ہونے کے بعد دوسرے ہاف میں بالآخر پہلا گول دیکھنے کو ملا۔ چیکیا کے لیے لادیسلاو کریجچی نے ہیڈر کے ذریعے گول کر کے اپنی ٹیم کو برتری دلائی۔ اس دوران جنوبی کوریا کی ٹیم دباؤ میں دکھائی دی، جس سے چیکیا نے بھرپور فائدہ اٹھایا۔ دلچسپ بات یہ رہی کہ کپتان کریجچی نے خود آگے بڑھ کر قیادت کی اور شاندار ہیڈر کے ذریعے جنوبی کوریا کے گول پوسٹ کا دفاع توڑنے میں کامیاب رہے۔

دوسرے ہاف میں پیچھے ہونے کے بعد جنوبی کوریا نے بھی جواب دینے میں زیادہ دیر نہیں لگائی۔ پہلے ہوانگ اِن بیوم نے 67ویں منٹ میں گول کر کے مقابلہ برابر کیا، پھر اوہ ہیون گیو نے 80ویں منٹ میں گول کر کے اپنی ٹیم کو 1-2 سے آگے کر دیا۔ اس کے بعد چیکیا نے مسلسل دباؤ بنانے کی کوشش کی۔ اسے چند مواقع بھی ملے، لیکن جنوبی کوریا کے گول کیپر نے شاندار کھیل کا مظاہرہ کرتے ہوئے 2 یقینی گول بچا لیے۔ اضافی وقت میں بھی چیکیا نے ہمت نہیں ہاری، لیکن وہ جنوبی کوریا کے دفاع کو توڑنے میں ناکام رہی۔ جنوبی کوریا نے اس میچ میں ایک گول سے پیچھے ہونے کے بعد صرف 13 منٹ کے اندر 2 گول کیے اور شاندار انداز میں مقابلہ اپنے نام کر لیا۔