ساؤتھ کے سپر اسٹار مہیش بابو کے والد کرشنا کا انتقال، 2 ماہ قبل والدہ نے لی تھی آخری سانس

حیدرآباد: ساؤتھ کے سپر اسٹار مہیش بابو کے والد کرشنا گھٹامانینی کا انتقال ہو گیا۔ مہیش بابو کے والد کرشنا گھٹامانینی بھی ایک مشہور تلگو اداکار تھے۔ وہ سپر اسٹار کرشنا کے نام سے جانے جاتے تھے اور ان کی عمر 79 سال تھی۔ انہوں نے منگل کی صبح 4 بجے حیدرآباد کے ایک نجی اسپتال میں آخری سانس لی۔

رپورٹ کے مطابق کرشنا گھٹامانینی کو پیر کو دل کا دورہ پڑنے کے بعد اسپتال میں داخل کرایا گیا تھا۔ تلنگانہ کے وزیر اعلیٰ کے چندر شیکھر راؤ نے کرشنا گھٹامانینی کے انتقال پر تعزیت کا اظہار کیا ہے۔ انہوں نے فلم انڈسٹری میں کرشنا گھٹامانینی کی 5 سال کی شراکت کو یاد کیا۔ مہیش بابو کے والد کی موت کی خبر سن کر مداح جذباتی ہو گئے۔ کرشنا گھٹامانینی کی موت کی خبر سے تلگو فلم انڈسٹری میں سوگ کی لہر دوڑ گئی اور سوشل میڈیا پر مداح اور مشہور شخصیات نم آنکھوں کے ساتھ ٹالی ووڈ کے لیجنڈ اسٹار کو خراج تحسین پیش کر رہے ہیں۔ آندھرا پردیش کے وزیر اعلی وائی ایس جگن موہن ریڈی نے بھی تجربہ کار اداکار کرشنا کی موت پر غم کا اظہار کیا ہے۔

یہ وقت مہیش بابو کے خاندان کے لیے مشکلات سے بھرا ہوا ہے اور خاندان ایک جذباتی سانحے سے گزر رہا ہے۔ مہیش بابو دو ماہ قبل اپنی ماں کو کھو چکے ہیں اور اب ان کے سر سے والد کا سایہ اٹھ گیا۔ رپورٹ کے مطابق مہیش بابو اپنے والدین کے بہت قریب تھے اور اکثر سوشل میڈیا پر ان کے ساتھ تصاویر شیئر کرتے تھے۔

گھٹامانینی اداکار، پروڈیوسر، ہدایت کار ہونے کے علاوہ وہ ایک سیاست دان بھی تھے۔ اپنے 5 دہائیوں کے کیریئر میں وہ تقریباً 350 فلموں میں نظر آئے اور انہیں سپر اسٹار کا درجہ حاصل ہوا۔ انہیں پدم وبھوشن سے بھی نوازا جا چکا تھا۔ کرشنا نے اپنے فلمی کیریئر کا آغاز چھوٹے کرداروں سے کیا تھا اور 1961 میں اداکاری کا آغاز کیا۔ ایک مرکزی اداکار کے طور پر وہ 1965 کی فلم تھینے ماناسولو میں نظر آئے تھے۔

کرشنا گھٹامنی نے دو شادیاں کی تھیں۔ پہلے اندرا سے اور دوسری وجے نرملا سے۔ ان کے اندرا سے پانچ بچے ہیں۔ ان کے دو بیٹے اور تین بیٹیاں ہیں۔ بیٹوں میں رمیش بابو اور مہیش بابو ہیں۔ دونوں بھائی فلم انڈسٹری سے وابستہ ہیں۔ کرشنا گھٹامانینی کی دونوں بیویوں کا پہلے ہیی انتقال ہو چکا ہے۔