دھرمیندر کے بعد اب عالمی شہرت یافتہ اداکار جیکی چین کے انتقال کی اڑی افواہ

بالی ووڈ کے ’ہی مین‘ کہے جانے والے معروف اداکار دھرمیندر کی حالت نازک بنی ہوئی ہے۔ وہ گزشتہ کچھ دنوں سے ممبئی کے بریچ کینڈی اسپتال میں زیر علاج ہیں۔ پیر کے روز سے ہی دھرمیندر کی موت کی جھوٹی خبریں میڈیا میں چل رہی تھیں۔ اس کے بعد ان کے خاندان کے لوگوں نے واضح کیا کہ دھرمیندر ابھی اسپتال میں زیر علاج ہیں اور ان کی حالت مستحکم ہے۔ دھرمیندر کے بعد ایک اور معروف اداکار جیکی چین کی موت کی افواہ اڑ گئی ہے۔

واضح رہے کہ جیکی چین کے حوالے سے سوشل میڈیا پلیٹ فارم پر دعویٰ کیا جا رہا ہے کہ مارشل آرٹسٹ اور معروف اداکار جیکی چین اب اس دنیا میں نہیں رہے۔ کچھ صارف کا کہنا ہے کہ 71 سال کی عمر میں جیکی چین نے دنیا کو الوداع کہہ دیا۔ حالانکہ ان خبروں میں کوئی سچائی نہیں ہے۔ لوگ جیکی چین کی تصویر اور ویڈیو کے ساتھ غلط نیوز پھیلا رہے ہیں۔

سوشل میڈیا پر ایک پوسٹ کے ذریعہ یہ بھی بتایا گیا کہ جیکی چین کا 4 روز قبل انتقال ہو گیا، یہ پوسٹ بھی 4 روز پرانی ہی ہے۔ اس میں لکھا ہوا تھا کہ ’’آج سنیما کی دنیا کی سب سے پیاری شخصیت، ہم سب کے دلوں میں بسنے والے ایک شخص (جیکی چین) کا انتقال ہو گیا ہے۔ خاص طور پر ہماری نسل کے ایک قابل اداکار، ایک عظیم کُنگ فو کھلاڑی، ایک مزاحیہ انسان جیکی چین کا انتقال ہو گیا ہے۔‘‘ ساتھ ہی پوسٹ میں جیکی چین کی تصویر بھی شیئر کی گئی ہے۔

اسی طرح ایک دیگر پوسٹ میں دعویٰ کیا گیا کہ ’’71 سالہ جیکی چین کو دہائیوں قبل لگی چوٹ کی وجہ سے کچھ دقت ہوئی اور پھر ان کا انتقال ہو گیا۔ ہالی ووڈ کے لیجنڈز نے انہیں خراج تحسین پیش کیا ہے اور اہل خانہ نے بھی اس کی تصدیق کر دی ہے۔‘‘ لیکن دوسری جانب کئی صارف نے غلط خبر پھیلانے والوں کو تنقید کا نشانہ بنایا ہے۔ ایک صارف نے لکھا کہ ’’فیس بک جیکی چین کو کیوں مارنا چاہتا ہے؟‘‘ ایک دیگر صارف نے لکھا کہ ’’آج انٹرنیٹ جیکی چین کو مارنے کی کوشش کر رہا ہے۔‘‘

قابل ذکر ہے کہ یہ پہلا موقع نہیں ہے جب جیکی چین کی موت کی افواہ اڑی ہو۔ 10 سال قبل یعنی 2015 میں بھی جیکی چین کے متعلق اسی طرح کے دعوے کیے گئے تھے۔ اس وقت اداکار نے خود جھوٹی خبروں کی تردید کرتے ہوئے کہا تھا کہ ’’میں جب فلائٹ سے اترا تو 2 خبروں نے مجھے حیران کر دیا۔ پہلی بات میں ابھی زندہ ہوں اور دوسری بات ریڈ پاکیٹس کے بارے میں میرے نام کا استعمال کر کے جو ’ویبو‘ پر گھوٹالہ چل رہا ہے، ان پر یقین مت کیجیے۔‘‘