ورلڈ ٹیسٹ چمپئن شپ: فائنل مقابلہ کے لیے جنوبی افریقہ اور آسٹریلیا نے اپنی اپنی ٹیموں کا کیا اعلان

ورلڈ ٹیسٹ چمپئن شپ کے فائنل مقابلہ کے لیے آسٹریلیا کے ساتھ ساتھ جنوبی افریقہ نے بھی اپنی اپنی ٹیموں کا اعلان کر دیا ہے۔ جنوبی افریقہ کی قیادت ٹیمبا بووما کے ہاتھوں میں ہوگی، جبکہ آسٹریلیائی ٹیم کی کپتانی پیٹ کمنز کرتے ہوئے دکھائی دیں گے۔ 11 جون سے کھیلے جانے والے اس فائنل مقابلے کے لیے لارڈس کا تاریخی میدان تیار ہے۔

جنوبی افریقی ٹیم کی بات کریں تو کپتان ٹیمبا بووما کے علاوہ ٹونی ڈی جورجی، ڈیوڈ بیڈنگھم، مارکو یانسن، ایڈن مارکرم، کائل ویرین، کاربن بوش، رائن ریکلٹن، ویان مولڈر، کگیسو رباڈا، ٹرسٹن اسٹبس، سینورن متھوسامی، لنگی اینگیڈی، کیشو مہاراج اور ڈین پیٹرسن کو 15 رکنی اسکواڈ میں شامل کیا گیا ہے۔ دوسری طرف آسٹریلیائی 15 رکنی اسکواڈ میں پیٹ کمنز کے علاوہ مچیل اسٹارک، اسکاٹ بولینڈ، جوش انگلس، اسٹیو اسمتھ، ایلیکس کیری، جوش ہیزل ووڈ، ٹریوس ہیڈ، کیمرون گرین، عثمان خواجہ، سیم کانسٹاس، مارنس لابوشین، میتھیو کہنمین، ناتھن لاین اور بیو ویبسٹر شامل ہیں۔

دونوں ٹیموں کو دیکھ کر اندازہ ہوتا ہے کہ ان ٹیموں کے کچھ بڑے کھلاڑی جو آئی پی ایل کی ٹیموں کا حصہ ہیں، وہ آئی پی ایل سے کنارہ ہو سکتے ہیں۔ یعنی کچھ بڑے کھلاڑیوں کی موجودگی آئی پی ایل میں دیکھنے کو نہیں ملے گی، جو کہ متعلقہ ٹیموں کے لیے ایک بڑا نقصان ہوگا۔ ہند-پاک کشیدگی کے درمیان آئی پی ایل جب منسوخ ہوا تو کئی غیر ملکی کھلاڑی اپنے وطن واپس لوٹ گئے۔ اب جبکہ آئی پی ایل 17 مئی سے پھر شروع ہونے والا ہے، تو خاص طور سے 13 غیر ملکی کھلاڑیوں پر فرنچائزی کی نظریں ہیں۔ یہ کھلاڑی ہیں پیٹ کمنز، مچیل اسٹارک، جوش ہیزل ووڈ، میتھیو ہیڈ، جوش انگلس، کگیسو رباڈا، ٹرسٹن اسٹبس، راین ریکلٹن، مارکو یانسن، لنگی اینگیڈی، ایڈن مارکرم، کاربن بوش اور ویان مولڈر۔