کوٹلہ میں ’کنگ‘ کوہلی ناکام، محض 6 رن بنا پائے، ریلوے کے تیز گیند باز نے لی وکٹ

دہلی کے فیروز شاہ کوٹلہ میدان پر رنجی ٹرافی کے مقابلے میں ’کنگ کوہلی‘ کے نام سے مشہور وراٹ کوہلی اپنی بہترین کارکردگی نہ دکھا سکے اور صرف 6 رن بنا کر ہیمانشو سانگوان کی گیند پر بولڈ ہو گئے۔ شائقین جوش و خروش سے کوہلی-کوہلی کے نعرے لگا رہے تھے لیکن ان کی جلد واپسی سے میدان میں سناٹا چھا گیا۔ یہ میچ دہلی اور ریلوے کے درمیان جاری ہے جہاں دہلی کے کپتان آیوش بدونی نے پہلے گیندبازی کا فیصلہ کیا تھا۔

وراٹ کوہلی 13 سال بعد رنجی ٹرافی کھیلنے میدان میں اترے۔ ان کا آخری رنجی میچ 2012 میں غازی آباد میں ہوا تھا، جب انہوں نے یوپی کے خلاف 43 رنز بنائے تھے۔ کوٹلہ میں اس میچ کے دوسرے دن یش دھول کے آؤٹ ہونے کے بعد کوہلی میدان میں اترے، لیکن وہ زیادہ دیر تک ٹک نہ سکے۔

دہلی کی ٹیم اس وقت 78/2 کے اسکور پر تھی جب کوہلی نے کریز پر قدم رکھا۔ انہوں نے شاندار اسٹریٹ ڈرائیو کے ذریعے ایک چوکا لگایا لیکن جلد ہی اپنی وکٹ گنوا بیٹھے۔ کوہلی کی ناکامی کے بعد میدان میں موجود شائقین بھی مایوسی کے ساتھ باہر جانے لگے۔

رنجی ٹرافی کے اس سیزن میں دہلی کے چھ میچوں میں صرف 14 پوائنٹس ہیں جبکہ ریلوے کے 17 پوائنٹس ہیں۔ دہلی کو اس میچ میں کامیابی کی سخت ضرورت ہے تاکہ وہ ٹورنامنٹ میں اپنی جگہ برقرار رکھ سکے۔

وراٹ کوہلی کا رنجی ٹرافی میں ریکارڈ 23 میچز میں 1553 رنز پر مشتمل ہے، جس میں 5 سنچریاں شامل ہیں۔ ان کا پہلا رنجی میچ 2006-07 کے سیزن میں ہوا تھا اور پہلی سنچری انہوں نے 2007-08 کے سیزن میں دہلی میں راجستھان کے خلاف بنائی تھی۔