ہندوستان-سری لنکا سیریز 18 جولائی سے شروع ہوگی

کولمبو: ہندوستان کا تین ون ڈے اور تین ٹی۔20 میچوں کے لئے سری لنکا دورہ نئے پروگرام کے مطابق 18 جولائی سے 29 جولائی تک کھیلے گا۔ ہندوستانی کرکٹ کنٹرول بورڈ (بی سی سی آئی) نے اس کی تصدیق کی ہے۔ اصل پروگرام کے مطابق یہ چھ میچ پہلے 13 جولائی سے 25 جولائی تک کھیلے جانے تھے۔ سری لنکا کیمپ میں کورونا کے کچھ معاملات آنے کی وجہ سے یہ تبدیلی کی گئی ہے۔ سری لنکا ئی ٹیم کے حال میں انگلینڈ دورہ سے واپسی کے بعد اس کے بلے بازی کوچ گرانٹ فلاور اور ویڈیو تجزیہ کار جی ٹی نروشن کورونا سے متاثر ملے تھے۔

بی سی سی آئی کے سکریٹری جے شاہ نے تصدیق کرتے ہوئے کہا کہ سری لنکا میں میچوں کا نیا پروگرام آیا ہے۔ سری لنکا بورڈ کے حکام نے سنیچر کی صبح بی سی سی آئی کے سکریٹری کے ساتھ نئے ترمیم شدہ پروگرام پر بات کی تھی۔ تمام میچوں کے لئے تاریخوں کا اعلان جلد کیے جانے کا امکان ہے۔

یہ بھی دلچسپ ہے کہ ہندوستانی ٹیم انتظامیہ سختی کے ساتھ کووڈ پروٹوکول پر عمل کر رہی تھی، لیکن اسے جمعہ کی دیر رات تک اس تبدیلی کے بارے میں پتہ نہیں تھا۔ شکھر دھون کی قیادت والی ٹیم 13 جولائی کو ہونے والے پہلے ون ڈے کے حساب سے تیاری کر رہی تھی۔ ہندوستانی ٹیم اب تین ون ڈے میچ 18، 20 اور 23 جولائی کو کھیلے گی اور تین ٹی۔20 میچ 25, 27 اور 29 جولائی کو کھیلے جائیں گے۔ تمام میچ کولمبو میں واقع آر پریم داسا انٹرنیشنل کرکٹ اسٹیڈیم میں کھیلے جائیں گے۔

سری لنکا کرکٹ نے براڈکاسٹر سونی اسپورٹس سے بھی رابطہ کرنے کی کوشش کی تھی جو گزشتہ ایک مہینے سے سیریز کو پرموٹ کر رہا تھا۔ براڈکاسٹر 13 سے 25جولائی کی پرانی تاریخ کو پسند کرتا، لیکن نئے پروگرام کے مطابق صرف دو میچ ہی اولمپک کھیلوں سے ٹکرائیں گے۔ کورونا کی موجودہ صورتحال میں تمام پروگرام میں تبدیلی پر رضامند ہوگئے ہیں۔ اولمپک کھیل 23 جولائی سے شروع ہونے ہیں۔