بی سی سی آئی کے چیئرمین سورو گنگولی کورونا وائرس سے متاثر، کولکاتا کے اسپتال میں داخل

کولکاتا: بورڈ آف کنٹرول کرکٹ ان انڈیا (بی سی سی آئی) کے چیئرمین اور انڈین کرکٹ ٹیم کے سابق کپتان سورو گنگولی کورونا سے متاثر پائے گئے ہیں۔ سورو گنگولی کے خاندانی ذرائع نے منگل کے روز یہ اطلاع دی۔ بی سی سی آئی چیئرمین کو کورونا سے متاثر پائے جانے کے بعد ایک نجی اسپتال میں داخل کرایا گیا ہے۔

یو این آئی اردو کے مطابق سورو گنگولی کو کورونا سے متاثر پائے جانے کے بعد پیر کو دیر رات گئے ووڈلینڈس اسپتال میں داخل کرایا گیا ہے اور ان کی حالت مستحکم ہے۔ رپورٹ کے مطابق گنگولی پہلی مرتبہ کورونا وائرس سے متاثر ہوئے ہیں، تاہم کچھ مہینے قبل ان کے اہل خانہ کورونا سے متاثر پائے گئے تھے۔

ٹیم انڈیا کے سابق کپتان سورو گنگولی کو اس سال کی شروعات میں بھی اسپتال میں داخل ہونا پڑا تھا۔ انہیں سینے میں درد کی شکایت کے بعد داخل اسپتال کرایا گیا تھا۔ رواں سال 2 جنوری کو سورو گنگولی کو کولکاتا کے ووڈلینڈس اسپتال میں داخل کرایا گیا تھا جہاں ان کی انجیوپلاسٹی انجام دی گئی تھی۔